منڈگوڈ:لائسنس کی مدت ختم ہونے کے بعد بھی ریت فروخت کرنے پر پولس کی کاروائی؛ 5لاریوں کو لیا تحویل میں
منڈگوڈ:11/ جنوری (ایس اؤنیوز)ریت سپلائی کرنے کے لائسنس کی مدت ختم ہونےکے بعد بھی ریت فروخت کرنے والی 5لاریوں کو پولس نے اپنی تحویل میں لے کر تحصیلدار کے حوالے کیا ہے اور تحصیلدار اشوک گرانی نےمناسب قانونی کارروائی کرنے کے لئے محکمہ اراضی اور کان کنی کو تحریری شکایت روانہ کی ہے۔ یہ واقعہ بدھ کو پیش آیا ہے۔
بتایا گیا ہے کہ لاریاں ریت کا لوڈ لے کر منڈگوڈ پہنچی تھیں جس کے دوران پولس نے کارروائی کرتے ہوئے انکولہ تعلقہ کی 5لاریوں کو تحویل میں لے لیا۔ موصولہ اطلاعات کے مطابق متعلقہ لاریوں کو 8جنوری کی صبح 8بجے سے رات 7بجے تک ریت فروخت کرنےکی منظوری دی گئی تھی مگر دیکھا گیا کہ 9جنوری کی دوپہر 30-1بجے منڈگوڈ محکمہ آب پاشی کے قریب لاریاں ریت فروخت کر نے میں مصروف تھیں ، پولس نے مصدقہ خبر پر کارروائی کرتے ہوئے لاریوں کو اپنی تحویل میں لے کر تحصیلدار کو اطلاع دی۔ معاملے کو لے کر تحصیلدار اشوک گرانی نے متعلقہ محکمہ کو رپورٹ ارسال کی ہے۔