نئی دہلی، 13جنوری(ایس او نیوز؍آئی این ایس انڈیا) دہلی کے ساؤتھ ایکسٹینشن پارٹ 1میں یو اینڈ آئی وولٹس کے دفتر پر محکمہ انکم ٹیکس نے چھاپہ ماری کی۔ کئی دنوں سے جاری چھاپہ ماری کی کارروائی میں اب تک 61 کروڑ سے زیادہ کی رقم اور زیورات لاکروں سے برآمد ہوئے ہیں۔ الزام ہے کہ یہ رقم بلڈروں اور گٹکھا تاجروں کی ہے۔ محکمہ انکم ٹیکس نے کالا دھن کے خلاف اپنی مہم کے تحت قومی دارالحکومت میں غیر قانونی نجی تجوریوں سے زیورات اور نقدی ضبط کی جس کی قیمت 20 کروڑ روپے سے زیادہ ہے۔ اسے ملاکر اب تک 61 کروڑ سے زیادہ کا مبینہ کالا دھن برآمد کیا جا چکا ہے۔ گزشتہ ہفتہ محکمہ نے دہلی کے ساؤتھ ایکسٹینشن میں مختلف لاکروں سے بے حساب نقدی اور 41کروڑ روپے کی قیمت کا سونا برآمد کیا تھا۔ مہم سے منسلک ذرائع نے بتایا کہ انکم ٹیکس حکام نے گزشتہ دو دنوں میں ایک اورتجوری کو کھولنے کے بعد اس میں سے 16 کروڑ روپے کی نقد رقم، 2.35 کروڑ روپے کا سونا چاندی اور 1.01 کروڑ روپے قیمت کے زیورات ضبط کئے تھے۔ یہ جائدادیں مبینہ طور پر دارالحکومت کے ایک بلڈر اور ایک گٹکھا تاجرکی ہیں ۔