بھٹکل:28/ نومبر (ایس اؤنیوز)پرشورام اسپورٹس کلب بھٹکل کے زیر اہتمام شہر کے گرو سدھیندراکالج میدان میں منعقدہ اُڈپی، شیموگہ اور اترکنڑا پر مشتمل بین الاضلاع کبڈی ٹورمنٹ میں میزبان پرشورام ٹیم نےایک سخت کڑے فائنل مقابلے میں اُڈپی کی جن درگا ٹیم کو شکست دے کر جیت حاصل کرتے ہوئے فتح کا جشن منایا ہے۔

پرشورام اور اُڈپی کی جن درگا ٹیم کے درمیان ٹورنامنٹ کا فائنل میچ پیر فجر کی اولین ساعتوں میں کھیلاگیا ۔جو بہت ہی دلچسپ اور کڑے مقابلے کا رہا۔ آخر کار پرشورام نے17-14سے جن درگا کو شکست دے کر خطاب پر اپنا قبضہ جمایا۔ فائنل میچ کے ہاف ٹائم تک دونوں ٹیمیں برابر کے اسکور پر رہیں، دوسری مدت میں پر شورام ٹیم معمولی بڑھوتری حاصل کرنےمیں کامیاب ہوئی ۔ اسی بڑھوتری کو قائم رکھتے ہوئے پرشورام ٹیم نے کامیابی حاصل کی۔

اس سے قبل ہوئے سیمی فائنل میچوں میں پرشورام نےمقامی کاسموس کو اور جن درگا نے اُڈپی کی اچھیلا ٹیم کو ہرا کر فائنل پہنچے تھے۔ جن درگا ٹیم کے وکرانت بیسٹ رائیڈر، پرشورام کے وشو انپا نائک بیسٹ کیچر، منوج نائک سنجیدہ کھلاڑی کے خطابات سے نوازاے گئے۔ ماستپا لچمیا نائک نے انعامات کی تقسیم کی ۔ ٹورنامنٹ میں 3اضلاع کی کل 38ٹیمیں شریک ہوئی تھیں۔ دو دنوں تک کھیلے گئے میچوں کا دیکھنے کے لئے ہزاروں شائقین محظوظ ہوئے۔

اس سے دو دن قبل نیلگوڈ چوڈیشوری مندر کے دھرم درشی مادیو سوامی جی نے ٹورنامنٹ کا افتتاح کرتےہوئے ملکی کھیل کبڈی کے ساتھ دیگر سماجی خدمات انجام دینے والے پرشورام اسپورٹس کلب کی انہوں نے ستائش کی ۔ صنعت کار بی سنیل نائک، تعلقہ پنچایت کے سابق صدر پرمیشور دیواڑیگا نے اپنے خیالات کااظہار کیا۔ سابق رکن اسمبلی جے ڈی نائک نے افتتاحی تقریب کی صدارت کی۔ اس موقع پر ڈاکٹر روی نائک، جٹپا نائک، مہیش نائک، شنکرشٹی ، پرشورام کلب کے صدر وینکٹیش دیواڑیگا وغیرہ ڈائس پر موجود تھے۔

صنعت کار سنیل بی نائک نے کھیل میدان کا اجراءکیاتو گنگادھرنائک نے استقبال کیا۔ یوگیش دیواڑیگا نے رپورٹ کی خواندگی کی۔ منجوناتھ نائک نے شکریہ اداکیا۔ شری دھر شیٹھ اور منجوناتھ نائک نے نظامت کے فرائض انجام دئیے۔