الیکٹری سٹی بل میں بے قاعدگی؛ چھ سات دنوں بعد میٹر کی ریڈنگ ریکارڈ کرنے اورزائد رقم وصول کرنے کا الزام؛ ہیسکام انجینر سے شکایت
بھٹکل 24/ستمبر (ایس او نیوز) الیکٹری سٹی بل میں بے قاعدگی کی شکایت کو لے کر مدینہ ویلفیر سوسائٹی کی جانب سے یہاں بھٹکل ہیسکام کے اسسٹنٹ انجینر کو ایک یادداشت پیش کی گئی جس میں اس بات کا الزام لگایا گیا ہے کہ ہیسکام کی جانب سے میٹر کی ریڈنگ کرکے بل دینے والے ہیسکام اہلکار ہر ماہ کی 9/ تاریخ کو آنے کے بجائے چھ سات دنوں بعد جب جی میں آئے گھروں میں آتے ہیں اور 9/تاریخ تک کی میٹر ریڈنگ ریکارڈ کرکے بل دینے کے بجائے 15 اور16 تاریخ کو میٹر کی جو ریڈنگ ہوتی ہے، اُسے نوٹ کرکے 9 تاریخ کا بل ہاتھ میں تھمادیتے ہیں۔ مدینہ ویلفیر سوسائٹی کے صدر مولانا عرفان ایس ایم ندوی نے اسسٹنٹ انجینر منجوناتھ سے راست گفتگو کرتے ہوئے بتایا کہ ایسا کرنے سے عوام سے زائد رقم وصول کی جارہی ہے، ان کے مطابق 9 تاریخ کو میٹر کی جو ریڈنگ ہوتی ہے، اُسے نوٹ ہی نہیں کیاجاتا، بلکہ 15 اور 16 تاریخ کی میٹر کی ریڈنگ نوٹ کی جاتی ہے اور بل میں چھ سات دن کی زائد ریڈنگ درج کرنے سے عوام چھ سات دنوں کی زائد رقم ہیسکام کو ادا کرتے ہیں، جو بالکل غلط ہے، انہوں نے ہیسکام انجینر سے مطالبہ کیا کہ گھر گھر جانے والے اپنے اہلکاروں سے اس تعلق سے معلومات حاصل کریں اور اس کو فوری طور پر روکیں۔ اس موقع پر گفتگو کرتے ہوئے جناب کوکاری نعیم صاحب نے بتایا کہ ایک تو زائد رقم عوام بھرتے ہیں، وہیں دوسری طرف بل کی ادائیگی کے لئے ہیسکام کی جانب سے 14 دنوں کی مہلت دی جاتی ہے، مگر بل 15/16 تاریخ کو ہاتھ میں تھمانے سے یہ مہلت بھی نہیں ملتی اور عوام کو 7/8 دنوں کے اندر بل بھرنا پڑتا ہے اور ایک دن کی بھی تاخیر ہونے پر اگلے بل میں جرمانہ عائد کیا جاتا ہے۔جناب نعیم کوکاری صاحب کو شک ہے کہ یہی معاملہ بھٹکل کے دیگر علاقوں میں بھی ہوتا ہوگا، مگر بھٹکل کے گھروں کے ذمہ دار زیادہ تر گلف میں رہنے کی وجہ سے گھروں میں موجود خواتین اس طرف توجہ نہیں دیتی ہوں گی۔ انہوں نے کہا کہ ابھی صرف مدینہ کالونی کے عوام کی نظروں میں یہ باتیں آئی ہیں۔
مدینہ ویلفئیر سوسائٹی کے ذمہ داران کی شکایتوں کو سنتے ہوئے ہیسکام اسسٹنٹ انجینر نے اُنہیں یقین دلایا کہ وہ اس بات کی جانچ کریں گے اور واقعی ایسا ہورہا ہے تو متعلقہ اہلکاروں کے خلاف کاروائی کرتے ہوئے اس بات کو یقینی بنائیں گے کہ جس تاریخ کا بل ہوگا، اُسی تاریخ کو اہلکار گھروں میں پہنچ کر میٹر کی ریڈنگ درج کرتے ہوئے بل دیں۔ یادداشت پیش کرنے کے موقع پر عبدالجلیل خطیب اور سمیع اللہ شیخ سمیت دیگر حضرات بھی موجود تھے۔