دہشت گردی کے الزام میں گرفتار سات میں سے چار کو مینگلور عدالت نے دیا با عزت بری کئے جانے کا حکم؛ بھٹکل کے شبیر مولانا بھی شامل
مینگلور 10 اپریل (ایس او نیوز) دہشت گردی کے الزام میں گرفتار مینگلور، اُلال، بنٹوال اور بھٹکل کے سات ملزمین میں سے چار کو آج مینگلور ڈسٹرکٹ اینڈ سیشن کورٹ نے باعزت بری کئے جانے کا حکم دیا ہے۔ ان تمام پر 2008 میں دہشت گردی کی مختلف دفعات کے تحت معاملات درج کئے گئے تھے اور 2008 سے 2009 کے درمیان ان کی گرفتاری عمل میں آئی تھی۔
پولس کی سخت سیکوریٹی کے انتظامات کے ساتھ آج پیر کو تمام ملزمین کو عدالت میں پیش کیا گیا، اس موقع پر ملزمین کے گھروالے بھی موجود تھے۔مینگلورتھرڈ ڈسٹرکٹ اینڈ سیشن کورٹ کی جج پشپانجلی نے بھٹکل کے مولانا شبیر گنگولی سمیت جملہ چار لوگوں کو تمام الزامات سے بری کرتے ہوئے باعزت رہا کرنے کا حکم دیا۔البتہ جج نے بقیہ تین لوگوں کے الزمات ثابت ہونے پر سزا سنائیں۔
جن چار لوگوں کو باعزت بری کرنے کا حکم جاری کیا گیا، اُن میں ایک بھٹکل کے مولانا شبیر گنگاؤلی ہیں، جبکہ دیگر میں اُلال کے محمد علی اور جاوید علی اوربنٹوال کے رفیق شامل ہیں۔ اسی طرح جن تین لوگوں پر جرم ثابت ہوا ہے، اُن میں مینگلور کے قریبی علاقہ ہلے انگڈی کے احمد باوا، پانڈیشور کے نوشاد اور بنٹوال کے فقیر شامل ہیں۔
خیال رہے کہ بھٹکل کے مولانا شبیر کو پونا میں پہلے نقلی نوٹ برآمد ہونے کے الزام میں گرفتار کیا گیا تھا، بعد میں ان پر دہشت گردی کے مختلف دفعات عائد کئے گئے تھے۔ نقلی نوٹ برآمد ہونے کے جرم میں اُنہیں پانچ سال کی سزا سنائی گئی تھی، بعد میں ان کے اچھے برتاؤ کو دیکھتے ہوئے چار ماہ پہلے ہی ان کی سزا ختم کی گئی تھی۔
مینگلور عدالت سے باعزت بری کئے جانے پر اے پی سی آر کے بھٹکل کے ذمہ داران نے نہایت خوشی کا اظہار کیا ہے۔ اُترکنڑا اے پی سی آر کے کنوینر قمر الدین مشائخ اور سرگرم رکن مولانا زُبیر ندوی اور عدالت میں ان کا کیس لڑنے والے ایڈوکیٹ ارشد بالور نے بتایا کہ ابتدا سے ہی وہ اس کیس کو ہینڈل کررہے تھے۔ اُدھر پونا میں آل انڈیا مجلس اتحاد المسلمین کے سرگرم رکن انجم انعامدار نے بھی مولانا شبیر کی رہائی پر نہایت خوشی کا اظہار کیا ہے ,انہوں نے بتایا کہ مولانا کو نقلی نوٹوں کے نام پر پھنسایا گیا تھا، ان کے مطابق پونا میں مولانا شبیر کے معاملات کی نگرانی وہ خود کر رہے تھے۔
اس تعلق سے تازہ اور تفصیلی رپورٹ کے لئے درج ذیل رپورٹ پڑھ سکتے ہیں:
