ہوناور18اگست (ایس او نیوز) مسلسل برسات کی وجہ سے شراوتی ندی پر واقع گیروسوپاٹیل ریس ڈیم سے کل جمعہ کے دن صبح کے وقت 61ہزار کیوسیکس پانی چھوڑا گیا جس کی وجہ سے شراوتی ندی میں پانی کی سطح میں تین فٹ کا اضافہ ہواتھا اور اس کے دائیں کنارے پر 35کیلومیٹر تک کے علاقے میں سیلاب آگیا تھا۔ تازہ ترین خبروں کے مطابق شراوتی ندی میں پانی کی سطح کم ہوگئی ہے اور جن لوگوں کومزید سیلاب کے خطرے کی وجہ سے نشیبی علاقے سے اونچی سطح والے علاقوں میں منتقل کیا گیا تھا وہ سب اپنے مکانوں میں واپس آ گئے ہیں۔ 

خیال رہے کہ بھاری برسات کی وجہ سے لنگن مکّی ڈیم میں پانی سطح بہت زیادہ بڑھ جانے کے بعد جمعرات کے دن صبح میں لنگن مکّی ڈیم سے 15ہزار کیوسیکس پانی چھوڑاگیا تھا۔ شام ہوتے ہوتے اس کی مقدار بڑھ کر 35ہزار کیوسیکس ہوگئی۔ جمعہ کے دن چھوڑے گئے پانی کی مقدار 61ہزار کیوسیکس ہوجانے کی وجہ سے گیروسوپا سے ہوناور تک 35کیلومیٹر کے علاقے میں کھیت ، باغات اور مکانوں میں سیلابی پانی گھس آیاتھا۔گیروسوپا نگر بستی کیری، تینگار، سمسی، اپّنی، ماگوڈ جیسے علاقے سیلاب کی زد میں آ گئے تھے۔

بتایاجاتا ہے کہ رکن اسمبلی سنیل نائک نے سیلاب سے متاثرہ علاقوں کا دورہ کیا۔کرناٹکا پاور کارپوریشن کے افسران سے صورتحال کے متعلق جانکاری حاصل کی اور حفاظتی بندوبست کا جائزہ لیا۔اس کے علاوہ جن لوگوں کوسیلاب کی وجہ سے مالی نقصان پہنچا ہے انہیں سرکار سے امداد دلانے کا تیقن دیاہے۔