کمٹہ 20؍اکتوبر(ایس او نیوز)کرناٹکا علاقائی ماہی گیرکانگریس کی طرف سے 19؍نومبر کو عالمی یوم ماہی گیر کے حوالے سے شہر کمٹہ ضلع شمالی کینرا کے منکی گراؤنڈ میں ماہی گیروں کی کانفرنس منعقد ہوگی جس کا افتتاح راہل گاندھی کریں گے۔

اڈپی میں منعقدہ پریس کانفرنس میں سابق رکن اسمبلی یو آر سبھاپتی نے اس بات کی اطلاع دیتے ہوئے اس عظیم الشان کانفرنس میں 60 سے 70ہزار تک ماہی گیر شریک ہونے کی توقع ظاہر کی۔سبھاپتی کے بیان کے مطابق اس کانفرنس میں ماہی گیروں کے بہت سارے مسائل حل کرنے اور مطالبات پورے کرنے کے سلسلے میں ریاستی اور مرکزی حکومت پر دباؤ ڈالا جائے گا۔ سب سے اہم مانگ یہ ہوگی کہ پورے ملک کے لئے ماہی گیری سے متعلق یکساں قانون اور اصولوں پر عمل ہو۔ جب کہ اس وقت ہر ریاست کے اپنے اپنے جداگانہ قوانین ہیں، جس سے مختلف ریاستوں کے ماہی گیروں کے درمیان آپسی رنجش اور چپقلش سامنے آتی رہتی ہے۔

انہوں نے یہ بھی کہا کہ ہر ریاست کی وزارت ماہی گیری ہوتی ہے اور اس کا ایک وزیر ہوا کرتا ہے ، لیکن اب تک مرکزی حکومت میں وزارت ماہی گیری کا قلمدان نہیں ہے اور محکمہ وزیر زراعت کے تحت ہی چل رہاہے۔ لہٰذا ایک مطالبہ یہ بھی ہوگا کہ مرکزی حکومت میں بھی وزارت ماہی گیری قائم کی جائے۔اس کے علاوہ ماہی گیر طبقہ کو پسماندہ طبقات کے شیڈول میں شامل کرنے کے لئے برسہابرس سے کیا جانے والا مطالبہ پوراکرنے پر بھی زور ڈالا جائے گا۔سابق رکن اسمبلی نے کہا کہ ریاست میں ماہی گیروں کی آبادی 23لاکھ سے زیادہ ہے۔ اس لئے آئندہ اسمبلی انتخابات میں 8تا 10سیٹوں پر ماہی گیر طبقے کے لیڈروں کو الیکشن لڑنے کا موقع دیا جانا چاہیے۔

انہوں نے بتایا کہ ضلع اور بلاک سطح پر کانفرنس کی تیاری کے لئے کمیٹیاں تشکیل دی گئی ہیں۔ یکم نومبر کو مرکزی حکومت کی غلط پالیسیوں کی مذمت کرتے ہوئے احتجاجی مظاہرے کا اہتمام کیا جائے گا۔