نئی دہلی،22؍مارچ(ایس او نیوز؍آئی این ا یس انڈیا)اسی سال ہندوستان کی میزبانی میں کھیلے جانے والے فیفا انڈر 17 ورلڈ کپ کی تیاریاں کا جائزہ لینے آئے فیفا کے وفد نے کہا ہے کہ وہ قومی دارالحکومت کے جواہر لال نہرو اسٹیڈیم کی تیاری سے مطمئن ہے لیکن ساتھ ہی کہا کہ ابھی بہت سے کاموں کو انجام دیا جانا باقی ہے۔ فٹ بال کی ریگولیٹری ادارے فیفا کے ٹورنامنٹ کے سربراہ آئمایا رجا اور انڈر 17 ورلڈ کپ کے ٹورنامنٹ ڈائریکٹر جیویر سیپی نے بدھ کو اسٹیڈیم کا معائنہ کیا۔اس وفد نے تقریبا ایک سال پہلے بھی اسٹیڈیم کی تیاریوں کو جانچا تھا۔ معائنہ کے بعد یارجا نے کہاکہ میں یہاں ایک سال بعد آکر خوش ہوں، ہم نے یہاں بہت بہتر محسوس کیا ہے۔ فیفا کام سے مطمئن ہے، ساتھ ہی ہم حکومت اور وزارت کھیل کی طرف سے ملنے والی مدد سے بھی خوش ہیں لیکن ہمیں یہ بات ذہن میں رکھنی ہو گی کہ ہمارے پاس زیادہ وقت نہیں ہے۔ دہلی میں ابھی کافی کام باقی ہے، جو کیا جانا ہے۔انہوں نے کہاکہ میں یہاں کام کرنے والے تمام لوگوں کی تعریف کرتا ہوں لیکن اب ہمیں اور تیزی سے کام کرنا ہوگا۔ ورلڈ کپ کے لئے جو ضروری ہے، وہ ہمیں وقت پر کرنا ہوگا، ہم نے چیزوں کو بہتر ہوتے دیکھا ہے، مجھے امید ہے کہ حکومت اور وزارت اب محنت سے کام کریں گے۔ٹورنامنٹ کے ڈائریکٹر سیپی نے کہاکہ حکومت، وزارت کھیل اور ہندوستانی کھیل اتھارٹی (سائی) نے اچھا تعاون دیا ہے، یہ انہی کی بدولت ممکن ہوا ہے لیکن، میں یارجا کی بات سے اتفاق کرتا ہوں، اب بھی کئی کام باقی ہیں۔

اسٹیڈیم میں کہاں بہتر بنانے کی ضرورت ہے، اس کے جواب میں یارجا نے کہاکہ میدان اور پریکٹس میدان میں بہتری کی گنجائش ہے، ان کے پاس منصوبہ ہے اور اسی پر کام کر رہے ہیں، میرے حساب سے دو جگہیں ہیں جہاں کام باقی ہے۔ 

فیفا کے وفد کو امید ہے کہ اگلے ماہ تک باقی کام مکمل ہو جائے گا۔یہ وفد چند ماہ بعد پھر میدان کا معائنہ کرے گا۔ورلڈ کپ اکتوبر میں شروع ہو جائے گا اور اس دوران دیوالی ہونے کی وجہ سے دہلی میں ہونے والے میچوں میں آلودگی کے مسئلے سے پریشانی کھڑی ہو سکتی ہے لیکن یارجا کا کہنا ہے کہ انہوں نے اس کے لئے احتیاط برتنے کی تیاری کر لی ہے۔