ہیملٹن،21؍مارچ(ایس او نیوز؍آئی این ایس انڈیا)نیوزی لینڈ کے خلاف 25 مارچ سے ہیملٹن میں شروع ہونے والے سیریز کے تیسرے اور آخری ٹیسٹ میچ سے پہلے جنوبی افریقہ کرکٹ سلیکشن کمیٹی نے اپنے ایک اور تیز بالر کو ٹیم سے باہر کر دیا ہے۔سی ایس اے نے اپنی ٹیم میں شامل فاسٹ بالر ڈین اولیور کو واپس جنوبی افریقہ بھیج دیا ہے۔ آپ کو بتا دیں کہ اس سے پہلے سی ایس اے منیجر نے اپنے آل راؤنڈر کرس مورس کو بھی موجودہ دورے سے واپس بھیج دیا تھا۔نیوزی لینڈ کے خلاف ہونے والے تیسرے ٹیسٹ میچ میں جنوبی افریقہ کے تین تیز گیند بازوں کے ساتھ ہی اس دورے کا اختتام کرنا چاہتا ہے، جہاں اس ٹیم میں مورنے مورکل، ورنو فلینڈر اورکنگسو رباڈا آئندہ ٹیسٹ میچ میں جنوبی افریقی ٹیم کے فاسٹ بولنگ اٹیک کا بوجھ سنبھالتے ہوئے نظر آئیں گے۔

واضح رہے کہ اس سے پہلے دوسرے ٹیسٹ میچ میں بھی ان ہی تینوں تیز گیند بازوں نے مہمان ٹیم کے تیز گیند بازی اٹیک کا بوجھ سنبھالا ہوا تھا، ساتھ ہی جنوبی افریقہ اس کو آگے بھی برقرار رکھنا چاہے گا۔اس کے علاوہ اس ٹیم کے ا سپن بولنگ کے شعبہ میں کیشو مہاراج اور جین پال ڈومنی کے ساتھ ساتھ پارٹ ٹائم اسپنر ڈین ایلگر بھی شامل ہیں، اگر ضرورت پڑی تو ٹیم میں شامل کئے گئے اسپنر ڈین پیٹ کو بھی کھلایا جا سکتا ہے۔اس سال انگلینڈ میں جون کے مہینے میں منعقد ہونے والی آئی سی سی چیمپئنز ٹرافی کے لئے بھی جنوبی افریقہ کے نوجوان کھلاڑیوں کو بخوبی تیار کر رہا ہے، جس سے وہ اس آئندہ ٹرافی میں بہترین کارکردگی کا مظاہرہ کر سکیں۔اس کے علاوہ نیوزی لینڈ کی ٹیم کو بھی دو کرارے جھٹکے لگ چکے ہیں جہاں میزبان ٹیم کے دو اسٹار کھلاڑی راس ٹیلر اور ٹرینٹ بولٹ زخمی ہونے کی وجہ سے ٹیم سے پہلے ہی باہر ہو چکے ہیں۔آپ کو بتا دیں کہ دونوں ٹیموں کے درمیان سیریز کا پہلا ٹیسٹ میچ ڈرا رہا تھا، دوسرا ٹیسٹ میچ ویلنگٹن میں کھیلا گیا تھا، جس کو جنوبی افریقہ نے 8 وکٹوں سے جیتا تھا، تیسرا اور آخری ٹیسٹ میچ 25 مارچ سے ہیملٹن میں کھیلا جائے گا۔ تین ٹیسٹ میچوں کی سیریز میں جنوبی افریقہ 0۔1 سے آگے چل رہا ہے۔