نئی دہلی: 24/مارچ(ایس او نیوز/آئی این ایس انڈیا)سی بی آئی نے جمعہ کو دہلی کی پٹیالہ ہاؤس کورٹ کی خصوصی سی بی آئی عدالت میں کوئلہ گھوٹالہ معاملے میں حتمی چارج شیٹ داخل کردی۔چارج شیٹ میں نوین جندل کے صلاح کار آنند گوئل، گڑگاؤں کی کمپنی گرین انفرا کے نائب صدر سدھارتھ مادرا، ممبئی کی کے ای انٹرنیشن کمپنی کے سی ایف او راجیو اگروال، نہار اسٹاک لمیٹڈ کے ڈائریکٹر بی ایس این سوریہ نارائن اور ممبئی کی ایسار پاور لمیٹڈ کے ایگزیکٹو نائب صدر سشیل کمار مار و کے نام شامل ہیں۔غورطلب ہے کہ گزشتہ 17/مارچ کو پٹیالہ ہاؤس کورٹ نے حتمی رپورٹ داخل نہ کرنے پر سی بی آئی کو پھٹکار لگائی تھی۔کورٹ نے کہا تھا کہ آپ کسی بھی صورت میں 24ما/رچ تک فائنل رپورٹ داخل کریں، اس کے بعد آج سی بی آئی نے اپنی رپورٹ داخل کی ہے۔گزشتہ20/فروری کو سی بی آئی نے اس معاملے سے متعلق دستاویزات کی تحقیقات کے لیے مزید وقت کی درخواست کی تھی جسے عدالت نے قبول کر لیا تھا۔معاملے کے تفتیشی افسر نے کہا تھا کہ انہوں نے رپورٹ فائنل کر دی ہے، لیکن اسے اعلیٰ افسران کو منظوری کے لیے  بھیجا گیا ہے۔اس سے پہلے سماعت کے دوران عدالت نے سی بی آئی کی اس بات کے لیے تنقیدکی تھی کہ انہوں نے مناسب شکل میں رپورٹ نہیں سونپی ہے۔سی بی آئی کے جس انسپکٹر نے رپورٹ سونپی تھی، اسے عدالت نے یہ کہا کہ آپ جونیئر افسر کی طرح برتاؤ نہ کریں اور تین دن کے اندر مناسب شکل میں رپورٹ عدالت کوسونپیں۔مذکورہ معاملہ 2008کا ہے جو امرکونڈا مرگادنگل کوئلہ کان جندل اینڈ پاور لمیٹڈ اور گگن اسپانج آئرن کو الاٹ کرنے میں مبینہ بے ضابظگی سے جڑا ہے۔