گروپور وجرے داہی مٹھ میں "گھر واپسی" کا واقعہ، عیسائی خاندان کے 5افراد دوبارہ ہندو دھرم میں داخل
منگلور،و25؍جولائی (ایس او نیوز)گروپور کے وجرے داہی مٹھ میں سوامی راج شیکھرا نندا کی موجودگی میں ایک عیسائی خاندان کی گھر واپسی کی رسوما ت انجام دئے جانے کی اطلاعات موصول ہوئی ہیں۔
کہا جاتا ہے کہ کاسر گوڈ کی رہنے والی ایک ہندو خاتون نے 40سال قبل اپنا دھرم پریورتن کرتے ہوئے عیسائی مذہب قبول کیا تھا اور آئیڈا تھامس بن گئی تھیں۔ ادھر پچھلے کچھ عرصے سے ان کے بیٹے ارون کومبینہ طور پر عیسائی مذہب میں دلچسپی کم ہوگئی تھی اور وہ ہندو طرز عبادت میں سکون محسوس کرنے لگا تھا۔کہتے ہیں کہ پدوین انگڈی نامی گاؤں میں ہندو جاگرن ویدیکے سے تعلق رکھنے والے ذمہ داران کے ساتھ ارون کے گہرے تعلقات قائم ہوگئے۔اور اس نے ان کو بتایا کہ وہ اپنے خاندان کے ساتھ ہندو دھرم میں واپس داخل ہونے کی خواہش رکھتا ہے۔پھر یہ بات ہندوجاگرن ویدیکے کے ذمہ داران نے وجرے داہی مٹھ کے سوامی شیکھرا نندا کے سامنے رکھی ۔ اس کے بعد سوامی جی کی رہنمائی میں گروپور مٹھ میں ہندو رسم و راج کی ادائیگی کے ساتھ ارون کے خاندان کے پانچوں افراد کو دوبارہ ہندو دھرم میں داخل کیا گیا اور ان کے کرسچین نام بدل کر ہندوانہ نام رکھے گئے۔ گھر واپسی کے اس واقعے کے بارے میں ہندو جاگرن ویدیکے اور سوامی شیکھرا نندا کا کہنا ہے کہ اس سلسلے میں ارون یا ا س کے خاندان والوں نے بغیر کسی کے دباؤ کے محض اپنی راضی خوشی سے ہندو دھرم میں واپسی کی ہے، کیونکہ عیسائی مذہب میں ان کے لئے مسائل پید اہوگئے تھے۔