چنتامنی:18 /جنوری(محمد اسلم/ایس او نیوز)حال ہی میں شہر کے مضافات میں واقع نائن ہلی کے قریب ایچ پی گیس ایجنسی کے گودام میں پیش آئے رسوئی گیس سلنڈر حادثہ کے بعد تعلقہ بھر میں غیر قانونی رسوئی گیس فروخت کرنے والوں کا پتہ لگانے کیلئے چکبالاپور ضلع سپرٹنڈنٹ آف پولیس چائترا ڈی وائی ایس پی کرشنامورتی کے زیر نگرانی میں خصوصی ٹیم تشکیل دی گئی تھی ۔

اُس ٹیم نے آج شہر کے کولار روڈ ٹی وی ایس شورم کے بازو میں پچھلے کئی دنوں سے غیر قانونی رسوئی گیس فروخت کررہے دکان پر چھاپہ مار تے ہوئے ٹیپونگر کا ساکن وسیم پاشاہ (34)کو گرفتارکرکے دکان میں موجود 11 ایچ ۔ پی اور بھارت ایجنسی کے رسوئی گیس سلنڈروں کو ضبط کرلیا ہے۔  پولیس ذرائع سے ملی اطلاع کے مطابق ٹیپونگر کا ساکن وسیم احمد اور منصور پاشاہ دونوں کئی دنوں سے آٹو رکشا ماروتی وین وغیرہ گاڑیوں کو غیر قانونی رسوئی گیس بھرنے  کا دھندہ کررہے تھے اس کی اطلاع ٹاون پولیس اہلکار کو ہونے پر پولس نے جائے واردات پرپہنچ کر وسیم احمد کو گرفتار کر لیا جبکہ منصور پاشاہ وہاں سے فرار ہونے میں کامیاب ہو گیا ٹاون پولیس نے دونوں کے خلاف معاملہ درج کرتے ہوئے مزید تحقیقات کررہی ہے۔