گنگولی ندی میں غرق ہوکر لاپتہ ہونے والے ماہی گیر کی نعش آج سمندر سے برآمد
گنگولی 23/جولائی (ایس او نیوز) کنداپور تعلقہ کے گنگولی ندی میں مچھلیاں پکڑنے کے دوران ندی میں گر کر لاپتہ ہونے والے ماہی گیر کی نعش آج برآمد کرلی گئی ہے جس کی شناخت سدھیندرا (32) کی حیثیت سے کی گئی ہے۔
گنگولی پولس تھانہ میں درج شکایت کے مطابق سدھیندرا، اپنے بھائی رگھویندرا اور مامو رتناکر کے ساتھ گھرکے قریب واقع سوپرنیک ندی میں مچھلیوں کا شکار کررہے تھے کہ اچانک سدھیندرا کا پیر پھسلنے سے وہ سیدھے ندی میں جاگرا، دونوں نے اسے بچانے کی ہرممکن کوشش کی، مگر ندی میں پانی کا بہائو تیز ہونے کی وجہ سے وہ ندی میں ڈوب کر لاپتہ ہوگیا۔
آج گنگولی لائٹ ہائوس کے قریب سمندر سے سدھیندرا کی لاش تیرتی ہوئی پائی گئی، جسے مقامی لوگوں نے باہر نکالا۔
سدھیندرا بنگلور کے ایک ہوٹل میں ملازم تھا، اور دس روز قبل ہی چھٹی لے کر گائوں آیا تھا، مگروہ موت کی آغوش میں چلا گیا۔
گنگولی پولس تھانہ میں اس تعلق سے معاملہ درج کیا گیا ہے۔
