بھٹکل کی سرحدناگولّی میں خنزیر کے ایک گروپ سے ٹکرا کر بائک سوار ہلاک؛ دوسرا زخمی
بھٹکل 9/اپریل (ایس او نیوز) جنگلاتی راستوں سے گذرتے وقت بالخصوص راتوں کے اوقات میں بے حد چاک و چوبند رہنا ضروری ہے کیونکہ روڈ پر کبھی بھی کوئی جانور دوڑتا ہوا آسکتا ہے، جس سے ٹکرانے کے نتیجے میں موت بھی واقع ہوسکتی ہے۔
اسی طرح کا ایک حادثہ ساگرروڈ سے کافی آگے بھٹکل کی سرحد ناگولیّ میں پیش آیا جب خنزیر کے ایک گروپ سے ٹکرا کر بائک سوار کی موت واقع ہوگئی حادثے میں دوسرا شخص شدید زخمی ہوگیا جسے قریبی اسپتال میں داخل کیا گیا ہے۔ حادثہ اتوار کی شب قریب نو بجے پیش آیا۔
موصولہ اطلاع کے مطابق سیوی چند ڈومنیک (58) اور جوش کورین (62) بائک پر سوار ناگولّی سے دیوگار جارہے تھے کہ راستے میں اچانک خنزیر کا ایک گروپ آگیا، جس سے ٹکرا کر بائک بے قابو ہوگئی اور دونوں سڑک پر گرگئے۔ مقامی لوگوں نے فوری طور پر ان دونوں کو بھٹکل سرکاری اسپتال پہنچایا، مگر اُس وقت تک ایک شخص اپنی آخری سانس لے چکا تھا۔ مرنے والے کی شناخت سیوی چند ڈومنیک کی حیثیت سے کی گئی ہے۔ حادثے میں جوش کورین زخمی ہوا ہے۔
ساگرتعلقہ کے کارگل پولس تھانہ میں معاملہ درج کیا گیا ہے۔
