بھٹکل  :4/ اگست (ایس اؤ نیوز)   پچھلے تین چاردنوں سے بس اسٹانڈ کے روبرو کار  اسٹانڈ کے قریب ایک انجان شخص غش کھا کر بیمار پڑا تھا۔ وہاں موجود افراد نے بھٹکل کے ایک رپورٹر کو اس کی اطلاع دی تو اس نے متعلقہ فرد کو  تعلقہ کے سرکاری اسپتال میں علاج کرواکر انہیں ان کے گھر روانہ کرتے ہوئے انسانی ہمدردی کا کام انجام دیا ہے۔

یکم اگست کی شام بھٹکل بس اسٹانڈ کے سامنے والے کاراسٹانڈ میں بیمار پڑے دیکھ کر مقامی رپورٹر کو اس  کی اطلاع دی گئی ۔ رپورٹر نے فوری طورپر جائے وقوع پہنچ کر بیمار زدہ انجان شخص کو سرکاری اسپتال میں علاج کے لئے داخل کروایا اور ساتھ ہی دو دنوں تک ا س کے کھانے پینے اور کپڑوں وغیرہ بندوبست کرنے کے بعد رپورٹر نے متعلقہ  شخص کی تصویر کے ساتھ وڈیو کلپ  سوشیل نیٹ ورک پر پوسٹ کردی۔ سوشیل نیٹ ورک پر پوسٹ کی جانے والی معلومات جنگل کے آگ کی طرح پھیل جاتی ہیں، جمعہ کی صبح ہی ان کے رشتہ دارو ں نے مقامی رپورٹر سے رابطہ کیا بھٹکل پہنچ کر رپورٹر کا شکریہ اداکرنےکے بعد بیمار شخص کو اپنے گھر لے گئے۔

انجان بیمار شخص کی شناخت سرسی کے تروملیشور ہیگڈے (44) بتائی گئی ہے۔ جو سرسی کے بیلی منے کا رہنے والا ہے۔ بتایا جاتاہے کہ وہ بڑی سواریوں کا ڈرائیور تھا ، مدھیہ پردیش، بہار سمیت ملک کے کئی ریاستوں کو سواری لے کر آجایا کرتاتھا۔ ذرائع سے ملی اطلاعات کے مطابق تروملیشور مہینوں بھٹکل کے سنڈے مارکیٹ سمیت کئی ایک جگہوں پر گھومتے ہوئے دیکھا گیا ہے۔ بہر حال مقامی رپورٹر ،ساحل آن لائن کے کنڑا نمائندے منجوناتھ نائک کے ساتھ رام نائک چوتھنی ، پرسنا بھٹ، ادئیے نائک نے انسانیت نواز کارروائی میں شریک تھے۔