بھٹکل، سداپور اور ہوناور بلدی اداروں کی ختم ہورہی ہے میعاد۔ فی الحال نہیں ہونگے انتخابات
کاروار 7؍مارچ (ایس او نیوز)بھٹکل، سداپور ار ہوناور کے بلدی اداروں کی میعاد کار آئندہ ہفتے میں ختم ہوجائے گی ، لیکن فی الحال ان اداروں کے انتخابات کے بارے میں سرکاری طور پر کوئی اعلان نہیں ہو اہے۔
بھٹکل اور سداپور ٹاؤن میونسپل کاونسل کی میعاد کار 12مارچ کو ختم ہونے والی ہے جبکہ ہوناور پٹن پنچایت کی میعاد 13مارچ کو اختتام پزیر ہوگی۔ لیکن ایسا لگتا ہے کہ پارلیمانی انتخابات ختم ہونے تک بلدی انتخابات منعقد کیے جائیں گے اور بلدی اداروں کے وارڈوں کی تقسیم اور ریزرویشن کی کارروائیاں وغیرہ پارلیمانی انتخابات کے بعد ہی انجام دی جائیں گی۔
خیال رہے کہ ریاست کے 101بلدی اداروں کے وارڈ ریزرویشن کا جو اعلان ہوا تھا اس پر بعض مقامات پر اعتراض جتاتے ہوئے معاملہ ہائی کورٹ میں لے جایا گیا ہے۔ عدالت کا فیصلہ آنے تک اس سلسلے میں مزید کوئی کارروائی نہیں ہوسکتی ہے، اور انتخابات منعقد کرنا ریاستی حکومت کے لئے ممکن نہیں ہے۔