بھٹکل بلدیہ افسران کے فرائض میں دخل اندازی کا الزام : دو افراد گرفتار
بھٹکل:02؍فروری (ایس او نیوز)کچروں کی ذخیرہ اندوزی کے سلسلے میں نوٹس دینے پہنچے بھٹکل میونسپالٹی افسران کی بے عزتی کرتے ہوئے ان کے فرائض میں مداخلت کرنے کے الزام میں بھٹکل پولس نے دولوگوں کو گرفتار کیا ہے جن کی شناخت آزاد نگر کے رہنے والے وسیم اور جنید کی حیثیت سے کی گئی ہے۔
بتایا گیا ہے کہ بھٹکل میونسپالٹی کی صحت عامہ کی آفسر سوجیا نوائط کالونی تنظیم روڈ پر واقع دو دکان مالکان کو کچروں کی ذخیرہ اندوزی کو لےکر نوٹس دینے پہنچی تھی۔ اسی دوران الزام لگایا گیا ہے کہ وہاں پہنچے وسیم نے دکانداروں کی طرفداری کرتے ہوئے آفسر کے ساتھ جھگڑا کیا، اور ان کے فرائض میں دخل اندازی کی ،میونسپل آفسر کی طرف سے پولس کو دی گئی شکایت میں وسیم کے ساتھ جنید بھی وہاں موجود ہونے اور آفسر کے ساتھ زبان درازی کرتے ہوئے وسیم کا ساتھ دینے کا الزام لگایا گیا ہے، جس پر پولس نے دونوں کے خلاف معاملہ درج کرتے ہوئے دونوں کو گرفتار کرلیا ہے۔ بھٹکل شہری پولس مزید جانچ کررہی ہے۔