بھٹکل:14؍نومبر (ایس او نیوز) آپسی عدم اعتماداور نفرت کی فضا کو دور کرتے ہوئے امن وسلامتی ، بھائی چارگی اور انسانیت کا پیغام پہنچانے جیسے  نیک مقاصد کو لے کر جماعت اسلامی ہند حلقہ کرناٹکا کے زیراہتمام 16نومبر سے 30نومبر تک ’’حضرت محمد ﷺ بنی نوع انسان کے عظیم رہنما‘‘ کے عنوان سے ریاست گیرسیرت مہم منائے جانے کی  جماعت اسلامی ہند بھٹکل کے امیر  مقامی مجاہد مصطفیٰ نے جانکاری دی ۔

وہ یہاں پریس کانفرنس میں بات کرتے ہوئے 15روزہ ریاست گیرسیرت مہم کی تفصیلات دے رہے تھے۔ پریس کانفرنس میں مہم کے کنونیر مولانا سید زبیر نے کہاکہ حضرت محمدﷺکی تعلیمات قیامت تک عالم کی رہنمائی کرتی ہیں، اگر ان کی تعلیمات کو صحیح طورپر عوام کے سامنے پیش کیا جائے تو یہ دنیا امن و سلامتی کا گہوارہ بن سکتی ہے۔ ملک کے عوام اگر نبی ﷺ کے پیغام کو صاف ذہنیت سے سمجھتے ہیں تو ملک ترقی کی راہوں پر گامزن ہوگا۔حضرت محمد ﷺ صر ف مسلمانوں کے نہیں بلکہ ساری عالم انسانیت کے آخری رسول و پیغمبر ہیں۔ انہی کی تعلیمات سے ٹوٹے ہوئے دلوں کو جوڑا جاسکتاہے۔ یہ ایک  ایسا نسخہ ہے جس سے انسانیت کے سارے امراض شفا ہونگے۔ ریاست گیر منائی جارہی حضرت محمدﷺبنی نوع انسان کے عظیم رہنما  مہم کے متعلق بھٹکل تعلقہ سطح پر کئی ایک پروگرام تشکیل دئیے گئے ہیں اس  دوران  عوام وخواص، افسران ، اساتذہ وغیرہ سے انفرادی و اجتماعی ملاقاتوں کا اہتمام ،مضمون نویسی ، کالج لکچرر، کارنر میٹنگ، کتابوں کی تقسیم وغیرہ کے ذریعے حضرت محمد ﷺ کی سیرت کا پیغام پہنچانے کی کوشش کی جائے گی۔ اس موقع پر مولانا نے تمام لوگوں سے تعاون کی اپیل کی۔

مہم کے ضلعی کنونیر محمد رضا مانوی نے بزبان کنڑا بات کرتے ہوئے کہاکہ انسانی زندگی کے لئے اللہ کے نبی ﷺکے تعلیمات زندگی کی آخری سانس تک اہم و ضروری ہیں۔ عالمی سطح پر ہر مذہب کے پیشواؤں ، مفکروں ، دانشور وں اور سائنس دانوں نے اللہ کے نبی ﷺ کی سیرت سے متاثر ہوکر اپنے بہترین خیالات کااظہار کیا ہے۔ ان پر نازل ہوئی کتاب قرآن اور ان کے اقوال حدیث صحیح طورپر مکمل ومحفوظ  ہیں اور آج بھی ان پر عمل پیرا ہونے سے انسانی زندگی ظلمتوں سے چھٹکار احاصل کرسکتی ہے۔ پریس کانفرنس میں ویلفئیر سوسائٹی کے چیرمن قادر میراں پٹیل موجود تھے۔