پٹنہ،09؍ دسمبر (ایس او نیوز؍آئی این ایس انڈیا) بہار کے بیگو سرائے میں ایک نابالغ بچی کی اجتماعی آبروریزی کا معاملہ سامنے آیا ہے۔ واقعہ ضلع کے مٹی ہانی تھانہ حلقہ کے سیتا رام پور میں پیش آیا۔ اطلاعات کے مطابق نو سالہ اور تیسری جماعت میں پڑھنے والی لڑکی کی پرانا ٹول رچیاہی کے چار نوجوانوں نے اجتماعی آبروریزی کی۔

اہل خانہ نے بتایا کہ متاثرہ جمعہ دیر شام کو اپنے نانیہال کچہری ٹول رچیاہی سے پیدل ہی اپنے گھر آرہی تھی۔ اس دوران لوچو چوک کے نزدیک پرانا ٹول رچیاہی کے رہنے والے سمت کمار اس کو کسی بہانے سے اپنے ساتھ لے گیا اور غائبکردیا۔ سمت کمار گروکل آشرم الاو اسکول کا ڈرائیور ہے اور اسی اسکول میں متاثرہ لڑکی بھی پڑھتی تھی، اس لئے وہ اس کے ساتھ چلی گئی۔

ادھر گھر نہیں پہنچنے پر اہل خانہ نے بچی کی تلاش شروع کی۔ اہل خانہ کو لگا کہ شاید لڑکی گھر سے صرف کچھ ہی دوری پر ہورہے سماریا گھاٹ رام کتھا میلہ میں چلی گئی ہوگی اور وہیں اس کی تلاش کی گئی۔ ہفتہ کی رات میں جب لڑکی گھر پہنچی، تو اس نے اہل خانہ کو بتایا کہ چار لڑکوں نے اس کی آبروریزی کی ہے۔

اتوار کی صبح پولیس کو اطلاع دی گئی۔ اسی درمیان لڑکی کا کپڑا اور موبائل فون پہنچانے کیلئے سمت کا بھائی سونو کمار لڑکی کے گھر پر آیا، جس کو مقامی لوگوں نے پکڑ لیا۔مٹی ہانی تھانہ کی پولیس مقامی لوگوں سے چھڑا کر اس کو اپنے ساتھ تھانہ لے گئی۔