بنٹوال،19؍اکتوبر(ایس او نیوز)اسمبلی الیکشن کے قریب آتے ہی پرجوش اور بے لگام تقریروں اور بیانات کا سلسلہ شروع ہوگیا ہے۔ کچھ دن پہلے وزیر اعظم نریندرا مودی کے سلسلے میں تمل زبان کا ناشائستہ اور غیر مہذب جملہ استعمال کرنے پر وزیر حج جناب روشن بیگ کے خلاف ہنگامہ کھڑا ہوگیا تھا اوربی جے پی کی طرف سے الگ الگ مقامات پر پولیس اسٹیشنوں میں شکایتیں درج کروائی گئی تھیں۔

اب تازہ معاملے میں جنوبی کینرا ضلع انچارج وزیر رماناتھ رائے کے سلسلے میں بدزبانی کرنے اور ہتک آمیز ریمارکس کے لئے بی جے پی ڈسٹرکٹ صدر سنجیوا ماتندور کے خلاف وٹلا پولیس اسٹیشن میں کانگریس کی طرف سے شکایت درج کروائی گئی ہے۔کہاجاتا ہے کہ وٹلا میں بی جے پی کی طرف سے کانگریس کے خلاف ستیہ گرہ کا اہتمام کیا گیا تھا۔اس دوران خطاب کرتے ہوئے بی جے پی ضلع صدر نے مبینہ طور پروزیر رماناتھ رائے اورایم ایل اے شکنتلا شیٹی کے خلاف ناشائستہ اور ہتک آمیز زبان کی تھی۔وٹلا بلاک کانگریس صدرمرلی دھر رائے کی شکایت پر پولیس نے سنجیوا کے خلاف کیس درج کرلیا ہے۔