بنگلورو،28؍اگست(ایس او نیوز) برہت بنگلور مہانگر پالیکے کی خطوط پر بی ڈی اے کی طرف سے اب غیر قانونی تعمیرات کی نشاندہی کرکے انہیں منہدم کرنے کی مہم شروع کرنے پر سنجیدگی سے غور کیا جارہاہے۔

شہر بھر میں بی ڈی اے کی طرف سے ترتیب دئے گئے لے آؤٹس میں پارکوں ، کھلے میدانوں اور سی اے سائٹوں پر غیر قانونی قبضے کرکے ان پر غیر قانونی تعمیرات کھڑی کرنے والوں کے خلاف کارروائی شروع کرتے ہوئے بی ڈی اے نے یہ فیصلہ کیا ہے کہ جنگی پیمانے پر یہ انہدامی مہم آگے بڑھائی جائے۔

بی بی ایم پی کی طرف سے جہاں شہر بھر میں بڑے نالوں پرغیر قانونی قبضوں کو ہٹانے کی مہم شروع کی گئی ہے تو بی ڈی اے کی طرف سے ان بڑے نالوں کے بفر زون کو بچانے کے لئے مہم شروع کرنے کا فیصلہ کیا گیا ہے۔ خاص طور پر ایسے نالے جن کے اطراف کی زمین بی ڈی اے کی ملکیت ہے اسے بفر زون کا حصہ بنادیا جائے گا اور ان پر تعمیر غیر قانونی عمارتوں کو منہدم کردیا جائے گا۔ اس دوران بی ڈی اے نے طے کیا ہے کہ شہر بھر میں اس کے جتنے بھی پارک، میدان اور سی اے سائٹ ہیں ان کا از سر نو سروے کیا جائے اور سروے کے بعد جو بھی زمینات بی ڈی اے کی حصے میں آئیں گی ان پر عوامی انفرااسٹرکچر کی سہولتوں کو کھڑا کیا جائے۔

بی ڈی اے نے طے کیا ہے کہ عوام کو جس مقصد کے لئے زمین منظور کی گئی ہے اس کے استعمال کا مقصد فوت نہ ہونے پائے یقینی بنایا جائے گا۔ خاص طور پر سی اے سائٹس جو عوامی سہولتوں کے لئے ہیں ان کی بڑی تعداد پر غیر قانونی قبضہ کرنے کے بعد لوگوں نے ان پر تعمیرات کھڑی کرلی ہیں۔ ان تعمیرات کی نشاندہی کے لئے بی ڈی اے کی طرف سے اس کے پاس دستیاب ریکارڈ کی بنیاد پر سی اے سائٹوں کی نشاندہی کرے گی اور جہاں بھی بی ڈی اے کی منظوری کے بغیر سی اے سائٹوں کا استعمال کیا گیا ہے ان کو بلامروت خالی کرایا جائے گا۔ اور غیر قانونی طور پر بی ڈی اے کی املاک پر قبضہ کرنے والوں کے خلاف قانونی چارہ جوئی بھی کئی جائے گی۔