جنوبی کینرا میں پھر شروع ہوا قاتلانہ حملوں کا سلسلہ۔ امتیاز کے بعد بجرنگ دل لیڈرہریش شیٹی پر تلواروں سے حملہ
منگلورو25؍ستمبر(ایس او نیوز)جنوبی کینرا کے ساحلی علاقے میں قاتلانہ حملوں کا سلسلہ دوبارہ شروع ہونے کے آثار نظر آنے لگے ہیں۔ پھولوں کے تاجر اور ہندوتووادی کارکن پرشانت پجاری قتل میں ملزم بتائے گئے اور ضمانت پر رہا ہونے والے امتیاز پر موڈبیدری میں ایک ناکام قاتلانہ حملہ ہوا جس میں امتیاز بال بال بچ گیا اور اسے زخمی حالت میں منگلورو کے اسپتال میں داخل کیا گیا ہے۔
اب ایک اور تازہ واردات سامنے آئی ہے جس میں منگلورو کے سولپاڈی علاقے میں بس ایجنٹ کے طور پر کام کرنے والے بجرنگ دل لیڈر ہریش شیٹی پر تلواروں سے حملہ کیا گیا ہے جس سے اس کے ہاتھ اور سر پر گہری چوٹیں آئی ہیں۔ ہریش کو منگلورو کے اے جے اسپتال میں داخل کیاگیا ہے۔
موصولہ رپورٹ کے مطابق ہریش شیٹی گروپور میں بجرنگ دل کا کنوینر ہے۔ کل رات 8بجے جب وہ اپنی موٹر بائک پر جارہاتھا تو دو موٹر سائیکلوں پر سوار ہوکر آنے والے افراد نے اس پر تلواروں سے حملہ کیا اور موقع پر سے فرار ہوگئے۔ ہریش پر قاتلانہ حملے کو اس سے ایک دن پہلے امتیاز پر ہوئے حملے کا انتقام سمجھا جا رہا ہے۔ ہریش پر حملے کی خبر ملتے ہی سنگھ پریوار کے کارکنان کا ہجوم اسپتال کی طرف دوڑ پڑا ۔ خبر ملی ہے کہ اراکین اسمبلی اوما ناتھ کوٹیان، دیو ویاس کامتھ اور بھرت شیٹی نے اسپتال پہنچ کر ہریش کی خبر گیری کی اور شرپسندوں کو جلد ازجلد گرفتار کرنے کے سلسلے میں پولیس کو ہدایات دیں۔
بجپے پولیس اسٹیشن میں معاملہ درج کرلیا گیا ہے۔ پیش بندی کے طور پر ضلع جنوبی کینرا میں حفاظتی بندوبست سخت کردیا ہے۔
