اسمبلی انتخابات میں مایوس کن نتائج دلتوں کو آسمان پر چڑھانے کا شاخسانہ ہے : بی جے پی ایم ایل اے کا خیال
لکھنؤ :11/دسمبر (ایس او نیوز/آئی این ایس انڈیا)پانچ اسمبلی ریاستوں میں انتخابات کے مطلوبہ نتائج نہ آنے سے بی جے پی کے مرکزی اور ریاستوں کی قیادت حیران ہے۔ خاص طور پر مدھیہ پردیش، راجستھان اور چھتیس گڑھ کے نتائج کو لے کر پارٹی لیڈروں نے جس طرح کے دعوے کئے تھے، نتائج اس کے برعکس آئے ۔اس صورتحال میں پارٹی کے اندر اور باہر اسے لے کر بیان بازی شروع ہو گئی ہے۔اتر پردیش کے بلیا ضلع کی بیریا اسمبلی سیٹ سے بی جے پی کے رکن اسمبلی سریندر سنگھ نے اسمبلی انتخابات کے رجحانات پر اپنی رائے سامنے رکھی ہے۔ انہوں نے کہا ہے کہ اعلی برادری کو نیچا کرکے دلتوں کو آسمان پر چڑھانا ٹھیک نہیں ہے۔ ان کے مطابق حالیہ اسمبلی انتخابات میں پارٹی کی درگت کی اصل وجہ یہی ہے کہ دلتوں کو خصوصی جگہ دی گئی ہے ۔