دنیا نے ہندوستان کی طاقت کو مانا ہےتو پاکستان کیوں نہیں مان رہا ہے،آنند شرما کا پی ایم مودی سے سوال؛ دعووں پرگھیرا،سرحدکی حفاظت میں ناکامی پر لیا آڑے ہاتھ
نئی دہلی،،4؍اگست(ایس او نیوز؍آئی این ایس انڈیا) وزیر اعظم ’’من کی بات‘‘تو کرتے ہیں، لیکن جب سرحد پر واقعات ہوتے ہیں تو وہ خاموشی اختیار کر لیتے ہیں،ابھی کئی واقعات ہوئے ہیں، جن پر وزیر اعظم کا کوئی بیان نہیں آیا۔ہندوستان کی غیرملکی اور اسٹریٹجک شراکت داروں کے ساتھ رفتار موضوع پر راجیہ سبھا میں بحث کے دوران کانگریس کے سینئر لیڈر آنند شرما نے وزیر اعظم پر تبصرہ کرنے سے نہیں چوکے۔وزیر اعظم امریکہ جاکر یہ کہتے ہیں کہ ہندوستان کی طاقت کے سامنے دنیا نے ماتھا جھکا دیا،دنیا نے ہندوستان کی طاقت مان لی، اسے قبول کر لیا۔آنند شرما نے کہا کہ دنیا نے ہندوستان کی طاقت کو تو مان لیا لیکن پاکستان نہیں مان رہاہے۔سرجیکل اسٹرائیک کے بعد سے بہت سے واقعات ہوئے ہیں،اس پر لگام نہیں لگ رہا ہے۔ہند۔چین تعلقات پر آنند شرما نے پنڈت جواہر لال نہرو کے 1959میں پارلیمنٹ میں دیئے گئے بیان کا ذکر کیا اور کہا کہ سکم اور بھوٹان کی ذمہ داری ہندوستان کی ہے جبکہ اس وقت سکم کی حیثیت ویسی نہیں تھی جیسی آج ہے۔