منگلورو: بیلّور کراس پر حادثہ۔ دونوجوان ہوئے ہلاک۔10افراد زخمی
منگلورو19؍فروری (ایس او نیوز)شہر سے بنگلورو کی طرف جانے والی ایک ٹویوٹا کار بیلّور کراس کے پاس حادثے کا شکار ہوگئی جس میں دو نوجوان موت کا شکار ہوگئے اور دیگر دس افراد زخمی ہوگئے جن میں پیدل راہگیر بھی شامل بتائے جاتے ہیں۔
حادثے میں مہلوک نوجوانوں کی شناخت امتیاز(20سال) اور محمد شاہنواز (19سال) کے طور پر کی گئی ہے۔جبکہ مزمل، صفوان اور مشتاق شدید زخمی ہوئے ہیں ۔ شاہنواز، ہدایت اللہ، شیروان، محمد شاکر،سلمان فارش اور شاہنوازکو معمولی چوٹیں آئی ہیں۔ یہ تمام نوجوان کنور کے رہنے والے بتائے جاتے ہیں۔ سوشیلمانامی ایک ٹیچرجو اس مقام سے پیدل گزر رہی تھی ، وہ زخمی ہوگئی ہے۔
بتایاجاتا ہے کہ ٹویوٹا انووا کار میں ان نوجوانوں نے چار دن کے ٹور کا پروگرام بنایا تھا۔ صبح 2بجے وہ کنور سے بنگلورو کی طرف نکلے تھے۔ صبح 7بجے کے قریب نیشنل ہائی وے 75پر اچانک کار کا ٹائر پھٹ جانے سے کار بے قابو ہوگئی اور سڑک کنارے ڈھانے کے کمپاؤنڈ سے ٹکراگئی۔ ٹکر ایسی شدید تھی کہ امتیاز اور محمد شاہنواز موقع پر ہی فوت ہوگئے۔امتیاز کے بارے میں معلوم ہوا ہے کہ منگلورو کے بندر علاقے میں اس کی چاکلیٹ کی دکان تھی جبکہ محمد شاہنواز منگلورو کے ایک پرائیویٹ کالج میں پی یو سی کا طالب علم تھا۔