بھٹکل 11 / جنوری (ایس او نیوز) ضلع اُترکنڑا کے منڈگوڈ تعلقہ میں منعقدہ بیلوں کو طیش میں لاکر  اُس کو قابو میں کرنے کے مقابلے میں بیل کے ایک نوجوان کو روندنے کی وجہ سے زخمی نوجوان کی اسپتال میں  موت واقع ہوگئی ہے، جس کی شناخت  چندرو آڈور (27 سال) کے طور پر کی گئی ہے ۔

ذرائع سے ملی اطلاع کے مطابق  منڈگوڈ کے کوڈمبی گرام میں بیلوں کو ڈراکر طیش میں لانے کا  مقابلہ منعقد کیا گیا تھا، جس کے دوران مقابلہ دیکھنے کے لئے آیا ہوا نوجوان  بیل کی زد میں آگیا اور شدید زخمی ہوگیا، اسے فوری طور پر مقامی اسپتال کے بعد زائد علاج کے لئے ہبلی لے جایا گیا تھا، مگر زخموں کی تاب نہ لاکر وہ چل بسا۔ اس معاملے میں پولس تھانہ میں معاملہ درج کیا گیا ہے ۔

اطلاع کے مطابق مقابلے میں  شیموگہ، ہاویری، رانی بینور، ہانگل، دھارواڑ وغیرہ سے پانچ سو سے زیادہ بیلوں کو شامل کیا گیا تھا ۔ اس موقع پر بیلوں کو ڈرانے کے مقابلے میں شامل نوجوانوں سمیت  ہزاروں کی تعداد میں تماشائی موجود تھے ۔ صبح 9 بجے شروع ہونے والا یہ مقابلہ شام کے وقت جب اپنے اختتام  کے قریب تھا تو چندرو نامی نوجوان ایک بیل کی زد میں آگیا ۔ سینے پر بیل کی ٹکر لگنے سے زخمی نوجوان کو پہلے تعلقہ اسپتال لے جایا گیا پھر وہاں سے ہبلی کیمس میں منتقل کیا گیا ۔ لیکن علاج کارگر نہ ہونے سے نوجوان نے اسپتال میں ہی آخری سانس لی ۔

    مہلوک نوجوان کے والد کریسپّا آڈور نے پولیس اسٹیشن میں شکایت درج کرتے ہوئے کہا ہے کہ اس مقابلے کے منتظمین نے طیش میں آئے ہوئے بیلوں سے تماشائیوں کو تحفظ فراہم کرنے کے لئے اقدامات نہیں کیے تھے جس کے نتیجے میں اس موقع پر تماشائی کے طور پر موجود اس کا بیٹا بیل کی ٹکر سے زخمی ہوگیا اور اس کی جان چلی گئی ۔      باضابطہ اجازت کے بغیر بیلوں کو ڈرانے کا مقابلہ منعقد کرنے والے کوڈمبی گرام کے دس افراد پر پولیس نے کیس درج کرلیا ہے اور چھان بین جاری ہے۔