منڈگوڈ میں شوہر کا عضو تناسل کاٹ کر قتل کرنے والی بیوی گرفتار
منڈگوڈ، 20 / مارچ (ایس او نیوز) شراب کے نشے میں مست شوہر کی فطری موت ہونے کی بات کہتے ہوئے اس کے آخری رسومات انجام دینے کے پندرہ دن بعد جب یہ معاملہ قتل کی واردات ثابت ہوا تو مقتول کی بیوی کو گرفتار کر لیا گیا اور اس نے اپنے جرم کا اعتراف کر لیا ۔
معلوم ہوا ہے کہ شہر میں لمبانی قبیلے سے تعلق رکھنے والے ٹوپنّا لمانی (44 سال) کی بیوی نے لوگوں کو بتایا تھا کہ نشے کی حالت میں نیچے گرنے سے ٹوپنّا کی موت واقع ہوئی ہے ۔ اس بات کو قبول کرتے ہوئے قبیلے کے بزرگوں نے ٹوپنّا کی آخری رسومات انجام دیں ۔ مگر کچھ دنوں بعد آس پاس کے لوگوں نے ٹوپنّا کی بیوی کو فون پر کسی سے کہتے ہوئے سنا کہ اس نے اپنے شوہر کے عضو تناسل کو کاٹ کر اسے ختم کر دیا ہے ۔ یہ بات قبیلے کے بزرگوں کے علم میں لائی گئی تو قبیلے کا اجلاس طلب کرکے اس خاتون کے موبائل کی جانچ کی گئی اور اس سے پوچھ تاچھ کی گئی تو اس نے اپنے جرم کا اعتراف کر لیا ۔ اس کے بعد قاتل بیوی کو پولیس کے حوالے کر دیا گیا ۔
پولیس نے معاملہ درج کر لیا ہے ۔ مزید تحقیقات جاری ہے ۔