سی اے اے کے خلاف احتجاج کرنے والوں کو بی جے پی لیڈر سی ٹی روی کی کھلے عام دھمکی، کہا گودھرا کے بعد کیا ہوا تھا، اسے نہ بھولیں
بنگلورو، 21/دسمبر (ایس او نیوز) ملک بھر میں جاری شہریت ترمیم قانون کے خلاف احتجاج اور مظاہرے کے بیچ کرناٹک بی جے پی رہنما سی ٹی روی نے ایک متنازع بیان دیتے ہوئے کہا کہ اگر ریاست میں اکثریت نے اپنا صبر و تحمل کھودیا تو صورت حال وہی ہوگی جو گودھرا کے بعد ہوئی تھی۔ لوگوں کو یہ نہیں بھولنا چاہئے کہ جب اکثریتی طبقے کا صبر و تحمل ختم ہوتا ہے تو کیا ہوتا ہے۔
انہوں نے کہا ریاست کی اکثریت بھی اس کو دہرانے کی اہل ہے۔ ہمارے صبر و تحمل کا امتحان نہ لیں۔ انہوں نے شہریت ترمیم قانون کے خلاف ہورہے مظاہرے کا حوالہ دیتے ہوئے کہا کہ یہ وہی ذہنیت ہے جس نے گودھرا میں ٹرین کو جلایا اور کار سیو کوں کو زندہ چلایا۔ انہوں نے کہا کہ یہ اس وجہ سے ہے کہ یہاں اکثریت صبر وتحمل کے ساتھ ہے اس لئے آپ ہر جگہ آگ لگارہے ہیں، میں آپ کو مشورہ دوں گا کہ آپ ماضی میں دیکھئے، جب ہمار اصبر و تحمل ٹوٹا تھا تو کیا ہوا تھا۔ انہوں ے کہا کہ ہمارا صبر و تحمل ہماری کمزوری نہیں ہے۔ ہم دیکھ رہے ہیں کہ آپ کیسے پبلک پراپرٹی کو آگ کے حوالے کررہے ہیں۔
ریاست کے کانگریس رہنما اور سابق وزیر یو ٹی قادر نے کہا کہ اگر وزیر اعلیٰ نے شہریت ترمیم قانون کو نافذ کیا تو حالات قابو سے باہر ہوجائیں گے اور ریاست میں فسادات ہوں گے۔ ان کے اس بیان پر سی ٹی روی نے کہا کہ اسی طرح کی ذہنیت کے ساتھ گودھرا میں کارسیوکوں کو جلایا گیا تھا۔ یوٹی قادر کو پتہ ہوگا کہ ردعمل ہونے پر کیا ہوسکتا ہے۔
غور طلب ہے کہ بی جے پی کے نیشنل جنرل سکریٹری بی ایل سنتوش نے جمعرات کو پولیس فائرنگ میں دو مظاہرین کی موت کیلئے یوٹی قادر کو ذمہ دار ٹھہرایا تھا۔
سی ٹی روی کے اس بات کے ردعمل میں سینئر کانگریس رہنما دنیش گنڈو راؤ نے کہا کہ یہ بیان بھڑکانے والا ہے۔ انہوں نے کہا کہ پولیس کو فوراً ان کے خلاف کارروائی کرنی چاہئے اور ان کو حراست میں لینا چاہئے۔ ایک آئینی عہدے پر رہتے ہوئے و ہ اس طرح کی زبان کا استعمال نہیں کرسکتے۔