کیا پھرایک بار کورونا اودھم مچائے گا؟ چین سمیت کئی ممالک کی صورتحال پرہندوستان میں بھی سخت تشویش
نئی دہلی، 21؍دسمبر(ایس او نیوز؍ایجنسی)چین میں کورونا مریضوں کی بڑھتی تعداد سے پھر ایک بار حالات خراب ہونے کا خدشہ ظاہر کیا جارہا ہے۔ ذرائع کے مطابق کچھ ایسی خبریں سامنے آئی ہیں جن میں بتایا جا رہا ہے کہ اسپتالوں میں بستروں کی کمی ہو گئی ہے اور ضروری دواؤں کی قلت بھی محسوس کی جا رہی ہے- چین ہی نہیں، دنیا کے کچھ دیگر ممالک میں بھی کورونا نے ایک بار پھر سے کہرام مچانا شروع کر دیا ہے- ان حالات کو پیش نظر رکھتے ہوئے حکومت ہند نے بھی احتیاط بڑھانے کا فیصلہ کیا ہے-
ذرائع سے ملی اطلاع کے مطابق مرکزی ہیلتھ سکریٹری نے ریاستوں اور مرکز کے زیر انتظام علاقوں کو ایک خط لکھا ہے جس میں کہا گیا ہے کہ جاپان، امریکہ، کوریا، برازیل اور چین میں کووڈ معاملوں میں اچانک اضافے کو دیکھتے ہوئے ملک میں آنے جانے والے پازیٹو کیسز کے نمونوں کی جینوم سیکوئنسنگ کرانا ضروری ہے- ہندوستانی سارس-کوو2- جینومکس کنسورٹیم (نساکوگ)نیٹورک کے ذریعے سے کورونا کے خطرناک ویریئنٹ کو ٹریک کرنے کے لئے ایسا کرنا لازمی ہے- مرکزی ہیلتھ سکریٹری کے ذریعے تحریر کردہ خط میں سبھی ریاستوں سے یہ یقینی کرنے کی گزارش کی گئی ہے کہ جہاں تک ممکن ہو سبھی کورونا پازیٹو معاملوں کے نمونے روزانہ کی بنیاد پر انساکوگ جینوم سیکوئنسنگ تجربہ گاہوں کو بھیجے جائیں - سبھی ریاستوں اور مرکز کے زیر انتظام خطوں کے لئے ان تجربہ گاہوں کو میپ کیا گیا ہے-واضح رہے کہ ہندوستان میں اس وقت کورونا کے معاملے قابو میں دکھائی دے رہے ہیں - گذشتہ ہفتے کے اعداد و شمار پر نظر دوڑائیں تو کورونا انفیکشن کے سبب ملک بھر میں 12 اموات درج کی گئی ہیں - گذشتہ تین دنوں سے ایک بھی موت کا معاملہ سامنے نہیں آیا ہے- مارچ 2020 ء کے بعد روزانہ موت کے معاملے میں یہ سب سے کم ہے- کورونا کے معاملوں کی بات کریں تو گذشتہ ہفتے کورونا کے 1103 نئے معاملے درج کیے گئے ہیں - یہ پہلے لاک ڈاون 23-29 مارچ 2020 ء کے بعد سے سب سے کم ہے- اس وقت 736 نئے معاملوں کا پتا چلا تھا جس کے بعد اگلے ہفتے یہ نمبر بڑھ کر 3154 پہنچ گیا تھا- اعداد و شمار کے مطابق گذشتہ ہفتے (دسمبر 12-18) میں گذشتہ سات دنوں میں کورونا کے معاملوں میں 19 فیصد کی گراوٹ دیکھی گئی ہے-اس دوران چینی اسمارٹ فون بنانے والی کمپنی شیاومی کئی محکموں کے ملازمین کی چھٹی کر سکتی ہے- کمپنی خراب عالمی معاشی حالات اور مقامی کووڈ19- لاک ڈاون کے درمیان اپنے ملازمین کی تعداد میں پندرہ فیصد کی تخفیف کر سکتی ہے- رپورٹ میں متاثرہ شیاومی ملازمین اور مقامی چینی میڈیا رپورٹس کے کئی سوشل میڈیا پوسٹ کا حوالہ دیا گیا ہے-چینی میڈیا آوٹ لیٹ جیمین کی ایک رپورٹ کے مطابق شیاومی اپنے اسمارٹ فون اور انٹرنیٹ سروس کاروبار کی کئی یونٹس میں ملازمتوں میں تخفیف کرے گی- گجمو چائنا نے بتایا کہ کچھ محکموں میں 75 فیصد تک چھٹی دیکھی گئی ہے، جبکہ دیگر میں تقریبا 40 فیصد ٹیموں کی تخفیف ہوئی ہے-