سوشیل میڈیا میں کیا گردش کررہا ہے: عدالت کا حکم سامنے آنے کے بعد ایاز احمد اصلاحی نام سے ایک مسیج سوشیل میڈیا پرتیزی سے وائرل ہورہاہے، متعلقہ مسیج کتنا سچ ہے ، اس کی ادارہ ساحل آن لائن کوئی توثیق نہیں کرتا، سوشیل میڈیا پر عدالت کے حکم کو لے کر کس بات کے چرچے ہورہے ہیں، اس سے عوام کو باخبر رکھنے کے لئےمتعلقہ مسیج کی نقل یہاں پیش کی جارہی ہے:

جیسا کہ خبر ہے کہ حکومت کے سروے کرنے والے افسروں نے بنارس کی گیان واپی مسجد کے وضوخانہ کے کنویں سے تین دن کی کوششوں کے بعد ایک پتھر ڈھونڈ نکالا ہے، جس کے بارے میں ان کا دعوی ہے کہ یہ تین فٹ لمبا پتھر ایک شیولنگ ہے۔ جب کہ مسجد کے ذمہ داروں کا کہنا ہے کہ کنویں سے نکلا پتھر فوارے کا پتھر ہے اور مسجد کے کنویں سے کوئی شیولنگ نہیں ملا ہے۔ بہر حال تیزی سے رونما ہوتے واقعات سے ایسا لگتا ہے جیسے سول عدلیہ کا جج بھی ایسی ہی کسی اطلاع کے انتظار میں بیٹھا ہو جس نے مبینہ جگہ کو قبضے میں لینے کا حکم نکالنے میں کوئی تاخیر نہیں کی۔ اس طرح بالآخر بی جے پی کی حکومت و انتظامیہ اور مقامی ججوں کی مل بھگت سے بنارس کی گیان واپی مسجد کو بھی بابری مسجد جیسے انجام تک پہنچانے کی باقاعدہ کوشش شروع کردی گئی ہے، پہلے مسجد کے اندر غیر ضروری اور غیر قانونی طور سے سروے کا حکم ایا اور اب اس سروے کی بنیاد پر مسجد کیمپس سے ایک شیو لنگ ڈھونڈنے کا دعوی پیش کردیا گیا ہے اور سول جج کی طرف سے ضلع انتظامیہ کو وہ جگہ جہاں سے یہ پتھر ملا ہے اسے پوری طرح قبضے میں لینے اور سیل کرنے کا حکم بھی آنا فانا صادر کردیا گیا ہے۔

میں سمجھتا ہوں سول جج بنارس، جس نے ایک پتھر یا شیو لنگ کے بہانے مسجد کی آراضی کو سیل کرنے کا حکمنامہ جاری کیا ہے،اگر اس کے اپنے گھر کے یا بیڈ کے نیچے گہرائی تک کھدائی ہو تو کوئی نہ کوئی شیولنگ یا پرانی مورتیوں کا یا مورتیوں جیسا کوئی نہ کوئی حصہ مل ہی جائے گا، پھر کیا ہوگا وہ ڈی ایم کو وہ جگہ قبضے میں لینے کا حکم دیں گے؟ دلچسپ بات یہ ہے کہ مسجد کے زمہ دار اس پتھر کو فوارے کا پتھر کہ رہے ہیں لیکن نہ تو ان کی بات مقامی جج سننے کو تیار ہیں اور نہ میڈیا والے جنھوں شیولنگ ملنے کی خبر کو ملک بھر میں پھیلانے میں بجلی کی سی تیزی دکھائی ہے۔ حالانکہ مختلف مقصد میں استعمال ہونے والے ایسے بہت سے پتھر ہیں جو دیکھنے والوں کو شیو لنگ کے مشابہہ لگیں گے، تو کیا بی جے پی حکومت کیا ایسے تمام پتھروں اور گھر کی پرانی چکیوں کو سیل کیا جائے گا؟ مسئلہ یہ ہے کہ جو لوگ ہر اینٹ اور پتھر کو بھگوان بنانے پر تلے ہوں اور ساتھ ہی نیت بھی صاف نہ ہو تو ان کے لیے ہر پتھر کو بھگوان بنا لینے میں کوئی مشکل نہیں ہوتی۔ وہ تو یہ کام چلتے پھرتے کر لیتے ہیں۔ نیت خراب ہو تو بدنیتوں کو اپنی ناروا خواہشات کو عملی جامہ پہنانے کے بہانے بھی ہزار ملتے ہیں۔ لیکن کب تک؟

بہر حال یہ بی جے پی / آر ایس ایس کا دور اقتدار ہے، اب تو مسلمانوں کا دل توڑنے کا کام کسی نہ کسی بہانے چلتا رہےگابس دیکھنا یہ ہے کہ یہ کھیل کب تک چلتا رہے گا اور وہ کھیل جو بابری مسجد کو ڈھانے سے شروع ہوا ہے اس کی انتھا کیا ہوگی۔۔۔۔ آیا ایک ظالمانہ ہندوتو راج کا قیام جس میں مسلمانوں کو بے نام و نشان کردیا جائے گا، یا ایک طویل خانہ جنگی اور نتیجے میں ملک کی تباہی ؟ یہ کھیل جیسا بھی ہو اور جب تک چلے ایک بات تو طے ہے کہ ظلم کا کھیل زیادہ دیر تک نہیں چلتا اور نہ ہی ظالموں کی سانسیں زیادہ دنوں چل پاتی ہیں۔ کاش اس ملک کی عدالتیں یہ سب سمجھ پاتیں اور فسطائی قوتوں کو بھی سمجھا پاتیں۔