سرسی  9 / جنوری (ایس او نیوز) ایسا لگتا ہے کہ گذ شتہ تین سال سے سیاسی طور پر الگ تھلگ رہنے والے اتر کنڑا ایم پی اننت کمار ہیگڈے نے اب پارلیمانی الیکشن میں سرگرم ہونے کا من بنا لیا ہے اس لئے اپنے حامیوں کے اجلاس منعقد کرتے ہوئے پارٹی پر دباو بنانے کی کوشش شروع کر دی ہے ۔ جبکہ اننت کمار ہیگڈے  کی اس حرکت سے بی جے پی  لیڈروں کی آنکھیں لال ہوگئی ہیں اور پیشانی پر بل نظر آنے لگے ہیں ۔

    اتر کنڑا سیٹ سے چھ مرتبہ پارنی الیکشن جیتنے والے اننت کمار ہیگڈے نے اپنی بیماری اور دوسرے اسباب سے سیاسی سنیاس لینے اور آنے والے لوک سبھا الیکشن میں حصہ نہ لینے کا ارادہ ظاہر کیا تھا ۔ گزشتہ تین برس سے سیاسی سرگرمیوں سے اپنے آپ کو پوری طرح دور کر لیا تھا ۔ اسمبلی الیکشن کے پس منظر میں وزیر اعظم نریندرا مودی کی آمد کے موقع پر بھی کنارہ کشی اختیار کی تھی ۔ 

    اب پتہ چلا ہے کہ پارلیمانی الیکشن قریب آتے ہی اننت کمار نے سابقہ روایت کے مطابق اپنی طاقت کا مظاہرا کرنے کے لئے اپنے حامیوں کا اجلاس طلب کرنے اور پارٹی لیڈروں پر دباو بنا کر ٹکٹ حاصل کرنے کی کوشش شروع کی ہے ۔ لیکن تین سال تک پارٹی کے لئے کوئی سرگرمی نہ دکھانے اور گزشتہ اسمبلی الیکشن میں پارٹی کے لئے مہم نہ چلاتے ہوئے ضلع اتر کنڑا میں پارٹی کی شکست کا سبب بننے والے اننت کمار ہیگڈے کی یہ بات بی جے پی لیڈروں کو ہضم  نہیں ہو رہی ہے ۔ بی جے پی کے اندر ہی اب اس طرح کی کوشش کے خلاف آواز اٹھنے لگی ہے اور اندرونی طور پر حمایت اور مخالفت کا رنگ ابھرنے لگا ہے ۔ 

    معلوم ہوا ہے کہ ابھی حال ہی میں اننت کمار ہیگڈے نے ہلیال کا دورہ کیا اور اس موقع پر پارٹی لیڈروں اور کارکنان کا اجلاس منعقد کرنے کی کوشش کی ۔ لیکن پارٹی کے اعلیٰ لیڈروں نے اس طرح کا اجلاس منعقد کرنے سے  منع کر دیا جس کے بعد اجلاس منسوخ کر دیا گیا ۔ اس پس منظر میں اننت کمار نے اپنے چند مخصوص حامیوں سے بات چیت کی اور واپس لوٹنے پر اکتفا کیا ۔