یوپی : یوم جمہوریہ کے موقع پر کسانوں کی ٹریکٹر مارچ پر الرٹ ، 17 اضلاع حساس
لکھنؤ،24؍جنوری (ایس او نیوز؍ایجنسی) یوپی وزیر اعلی یوگی آدتیہ ناتھ نے یوم جمہوریہ کے موقع پر عہدیداروں کو مکمل چوکس رہنے کی ہدایت دے ڈالی ہے۔ کیوں کہ کسانوں نے ٹریکٹر پریڈ لینے کا اعلان کیا ہے۔ کسانوں کی نقل و حرکت کے پیش نظر سے سینئر پولیس افسران کوریاست کے حساس 17 اضلاع میں نوڈل آفیسرز کے طور پر بھیجا گیا ہے۔
ہفتہ کے روز ہندوستانی کسان یونین کے لکھنؤ میں راج بھون کا ٹریکٹر کے ساتھ گھیرائو کرنے اور کسان تنظیموں کے 26 جنوری کو ٹریکٹر پریڈ لینے کے اعلان کے پیش نظر یوپی کے مکھیا یوگی نے پولیس اور انتظامی عہدیداروں کو ضروری اقدامات کرنے کی ہدایت دے ڈالی ہے۔ کسانوں کے مجوزہ پروگرام کو دیکھ کر وزیر اعلی نے اضلاع میں کسانوں کی تنظیموں کے نمائندوں سے بات کرنے کے بعد اس کا حل تلاش کرنے کی بھی ہدایت دی ہے۔
یوم جمہوریہ کے موقع پر کسانوں کے مجوزہ ٹریکٹر پریڈ کے لئے پولیس کو قبل از وقت الرٹ کردیا گیا ہے۔حساس اضلاع کے پولیس افسران سے کہا گیا ہے کہ وہ کسان رہنماؤں کو منوانے کی کوشش کریں اور کہیں بھی امن و امان متاثر نہ ہونے دیں۔ڈی جی پی ایچ سی اوستھی نے پہلے ہی اس سلسلے میں تفصیلی ہدایات جاری کردی ہیں۔