بھٹکل 26 فروری (ایس او نیوز) بھٹکل شمس الدین سرکل  پر  پلان کے مطابق ڈرینیج کو  وینکٹاپور ندی کی طرف موڑنے کے بجائے اس کا کنکشن غوثیہ اسٹریٹ  کی طرف موڑنے کی کوشش کا معاملہ سامنے آنے کے بعد ایک طرف    شرابی ندی صفائی کمیٹی کے اراکین نے   سخت  ناراضگی ظاہر کی وہیں    کونسلروں کی مداخلت کے بعد پیر کو  کام روک دیا گیا۔ میونسپل کونسلروں نے چیف آفسر  سے  مطالبہ کیا کہ کھودے گئے گڈھوں میں مٹی بھرنےکا بھی حکم دیا جائے  ۔

بتایا   گیا ہے کہ  نیشنل ہائی وے  کی ٹھیکیدار کمپنی آئی آر بی کی  طرف سے گذشتہ چار پانچ دنوں سے  انڈر گراونڈ ڈرینیج کا کام یہاں  شروع کیا گیا تھا، پلان کے مطابق یہاں سے ڈرینیج کو سیدھے وینکٹاپور ندی  کی طرف لے جانا چاہئے تھا لیکن کنٹریکٹر  اپنی آسانی کے لئے بغیر میونسپالٹی اور تعلقہ انتظامیہ کی اجازت لئے،  چوری چھپے  ڈرینیج کو غوثیہ اسٹریٹ کی طرف موڑنے کا کام کررہاتھا، اتوار شب کو  جیسے ہی میونسپل کونسلروں کو اس کی بھنک لگی، پیر صبح بعض کونسلرس سیدھے چیف آفسر سے رجوع ہوئے اور معاملہ دریافت کیا تو حیرت انگیز طو ر پر پتہ چلا  کہ میونسپل چیف آفسر سمیت تعلقہ انتظامیہ کو بھی  اندھیرے میں رکھ کر کنٹریکٹر اپنے طور پر ہی  فیصلہ لیتے ہوئے  ڈرینیج کو غوثیہ اسٹریٹ کی طرف موڑنے کی فراغ میں ہے۔

معاملہ سامنے آتے ہی ایک طرف کونسلرس نے  چیف آفسر کو آڑے ہاتھوں لیا تو دوسری طرف چیف آفسر نے میونسپل انجینر سمیت کنٹریکٹر کو آڑے ہاتھوں لیتے ہوئے  کام کو فوری طور پر  روکنے کا حکم دیا۔ چیف آفسر نیل کنٹھ میستا نے میونسپل انجینر کو تنبیہ کرتے ہوئے کہا کہ اگر کنٹریکٹر کام کو نہیں روکتا ہے تو اُس کے خلاف پولس تھانہ میں ایف آئی آر درج کرے۔ چیف آفسر نے کہا کہ پہلے ہی غوثیہ اسٹریٹ  میں پمپنگ اسٹیشن کو لے کرعوام بے حد پریشان ہیں، سینکڑوں کنویں  ڈرینج میں تبدیل ہوچکے ہیں اورقریبی شرابی ندی بھی گھٹر سے آلودہ ہوچکی ہے، ایسے میں  کنٹریکٹر کا میونسپالٹی کو بتائے بغیر اور تعلقہ انتظامیہ کو اندھیرے میں رکھ کر  من مانے طریقے پر کام کرنا  بالکل ناقابل قبول ہے اور اس کے خلاف پولس تھانہ میں شکایت درج کی جانی چاہئے۔ بعد میں میونسپل کونسلروں کے ساتھ چیف آفسر نے شمس الدین سرکل پر کھدائی کے کام کا مشاہدہ کرنے جائے وقوع پر پہنچے اور کام کو فوری طور پر روکنے کا حکم دیا۔ چیف آفسر نے بتایا کہ اس تعلق سے وہ  میونسپل  ایڈمنسٹریٹر یعنی اسسٹنٹ کمشنر کو  خبر کریں گے اور اگلی کاروائی انجام دی جائے گی۔

میونسپل کونسلرس  قیصر محتشم، فیاض مُلا،  عبدالعظیم ، محی الدین الطاف کھروری اور عبدالروف نائطے نے چیف آفسر کو واضح طور پر بتایا کہ اگر  شمس الدین سرکل  سے ڈرینیج کا کوئی بھی کنکشن غوثیہ اسٹریٹ سے جوڑنے کی کوشش کی گئی تو   سخت عوامی احتجاج کیا جائے گا اور غوثیہ اسٹریٹ  میں واقع پمپنگ اسٹیشن سے    ڈرینیج کا پائپ  جوڑنے کی اجازت ہرگز  نہیں دی جائے گی۔

یاد رہے کہ ڈرینج سے متاثرہ  شرابی ندی کی صفائی اور اسے گہرا کرنے سمیت ندی کے اطرف پچنگ وغیرہ کرنے کا بیڑا اُٹھاکر بھٹکل کے پرانے محلوں کی اسپورٹس سینٹروں پر مشتمل ذمہ داران کی ایک الگ کمیٹی ترتیب دی گئی ہے  اور قومی سماجی ادارہ مجلس اصلاح و تنطیم کی  سرپرستی  میں  مناسب اقدامات اُٹھائے جارہے ہیں،  ندی کی صفائی پر زور دیتے ہوئے عنقریب ایک احتجاجی مظاہرہ کا بھی منصوبہ بنایا جارہا ہے، ایسے میں شمس الدین سرکل اور رنگین کٹہ کے ڈرینج کوبھی     وینکٹاپور ندی کی طرف لے  جانے کے بجائے اُسے  غوثیہ اسٹریٹ کی طرف  موڑنے کی کوشش کا معاملہ سامنے آنے کے بعد ان اسپورٹس سینٹروں  کے اراکین نے گہری ناراضگی ظاہر کی ہے اور  متنبہ کرایا ہے کہ ایسی کسی  بھی کوشش  کو کامیاب  ہونے نہیں  دیاجائے گا۔