طوفانِ جوادکے باعث: اِن علاقوں میں UGC NET، IIFT امتحان ملتوی،نوٹس جاری
نئی دہلی، 4؍دسمبر (ایس او نیوز؍ایجنسی) یونیورسٹی گرانٹس کمیشن – قومی اہلیت ٹیسٹ (UGC-NET) اور انڈین انسٹی ٹیوٹ آف فارن ٹریڈ (IIFT) کا اتوار کو ہونے والا داخلہ امتحان جواد نامی طوفان کی وجہ سے اڈیشہ، آندھرا پردیش اور مغربی بنگال کے کچھ مراکز میں ملتوی کر دیا گیا ہے۔ نیشنل ٹیسٹنگ ایجنسی نے اپنی آفیشل ویب سائٹ پر ایک نوٹس جاری کرکے یہ اطلاع دی ہے۔
نوٹس میں کہا گیا ہے کہ UGC-NET 2020 اور جون 2021 کے امتحانات پوری، بھونیشور، کٹک، وشاکھاپٹنم کے برہم پور اور آندھرا پردیش کے گنجم اضلاع اور اڈیشہ کے رائے گڑھ ضلع کے گنو پور مراکز کے لیے دوبارہ شیڈول وضع کیے جائیں گے۔وہیں کولکاتہ اور مغربی بنگال میں درگاپور میں آئی آئی ایف ٹی کے ایم بی اے (انٹرنیشنل بزنس) کورس میں داخلے کے لیے منعقد ہونے والے امتحان ،اڈیشہ میں بھونیشور، کٹک اور سمبل پور اور آندھرا پردیش کے وجئے واڑہ اور وشاکھاپٹنم مراکز پر ملتوی کر دیا گیا ہے۔ این ٹی اے نے کہا کہ مذکورہ شہروں کے امتحان سینٹر میں داخلہ کے خواہشمند امیدواروں کے امتحان کی تاریخ کا اعلان بعد میں کیا جائے گا۔
تاہم امیدواروں کو مشورہ دیا جاتا ہے کہ وہ نوٹ کریں کہ التوا کا اطلاق صرف مذکورہ شہروں پر ہوگا اور امتحان اوڈیشہ، آندھرا پردیش، مغربی بنگال اور دیگر ریاستوں کے دیگر تمام شہروں میں شیڈول کے مطابق منعقد کیا جائے گا۔امیدوار تازہ ترین اپ ڈیٹس کے لئے NTA کی ویب سائٹ www.nta.ac.in پر لاگ ان کریں ۔یا پوچھ تاجھ کے لئے [email protected] پر ای میل بھی کرسکتے ہیں۔