اڈپی ،  7 / مارچ (ایس او نیوز)  پڈوبیدری پولیس اسٹیشن کے پی ایس آئی پرسنا اور ٹیم نے کیرالہ کے باشندے راجیو کے ذریعے بینکوں اور کوآپریٹیو سوسائٹیوں میں نقلی سونا گروی رکھتے ہوئے لاکھوں روپے کی جو دھوکہ دہی کی تھی اس کا پردہ فاش کیا ہے ۔ 
    
ملزم نے 30 گرام نقلی سونے کے زیورات مقامی سوسائٹیوں اور بینکوں میں گروی رکھ کر قرضے حاصل کرنے اور بینکوں اور سوسائٹیوں کو دھوکہ دینے کے لیے جو اسکیم تیار کی تھی وہ فلمی پلاٹ سے متاثر ہو کر انجام دی گئی تھی ۔

اس کے علاوہ دھوکہ دہی کی اس مجرمانہ کارروائی انجام دینے کے لئے  کمٹہ کے رہنے والے نیتل بھاسکر شیٹ (35)، سنجے شیٹ (42) اور بیلگاوی کے کیلاس گوراڈا (26) کو دھوکہ دہی کی سرگرمیوں میں کلیدی ملزم راجیو کی مدد کرنے کے الزام میں گرفتار کیا گیا ۔  تمام ملزمان کو عدالت میں پیش کر کے 15 روزہ جوڈیشل ریمانڈ پر جیل بھیج دیا گیا ہے ۔ 
    
پولیس نے کمپیوٹر سمیت 3.5 لاکھ روپے مالیت کی مشینری بھی ضبط کر لی، جسے سونے زیورات پر جعلی 916 ہال مارک مہریں لگانے کے لیے استعمال کیا گیا تھا ۔ 

راجیو نے اپنے دوست نیتل بھاسکر شیٹ کی مدد سے ایک خلیجی ملک کا سفر کرنے کا منصوبہ بنایا جس میں 30 گرام  نقلی سونے کے زیورات پہن کر جانا اور ہندوستان واپسی کے وقت 20 گرام اصلی سونے کے زیورات پہن کر لوٹنا تھا ۔

 کمٹہ کے دو دیگر ساتھیوں کو راجیو نے جعلی سونے کے زیورات بنانے کے لیے اپنے ساتھ  شریک کر لیا تھا، ان زیورات پر بیلگاوی میں ہال مارک کی مہر لگانے کا کام کیا گیا تھا ۔ 
    
لیکن راجیو نے بعد میں اپنی توجہ مقامی مالیاتی اداروں کو دھوکہ دینے پر مرکوز کر دی ۔ راجیو اور اس کی بیوی نے پڈوبیدری اور اچیلا میں مالیاتی اداروں سے قرضے حاصل کرنے کے لیے نقلی سونے کے زیورات گروی رکھے جسے جانچنے اور جعلسازی کا پتہ لگانے میں یہ مالیاتی ادارے ناکام رہے ۔ گروی رکھے ہوئے زیورات کی نیلامی کے دوران زیورات جعلی ہونے کا پتہ چلا تھا ۔