ملپے ساحل پر ڈوبتے ہوئے دو سیاحوں کو بچا لیا گیا - ایک شخص کی موت
اڈپی 19 / اپریل (ایس او نیوز) ضلع ہاسن کے بیلور سے تعلق رکھنے والے تین سیاح ملپے کے ساحل پر سمندر میں تیرتے وقت تیز لہروں میں بہہ گئے جن میں سے دو کو بچا لیا گیا جبکہ تیسرے شخص نے اسپتال میں منتقلی کے وقت راستے میں ہی دم توڑ دیا ۔
فوت شدہ شخص کی شناخت گریش (26 سال)کے طور پر کی گئی ہے ۔ ڈوبنے سے بچا لیے گئے سنتوش (24 سال) اور ہریش (30 سال) کو منی پال اسپتال میں داخل کیا گیا ہے۔
معلوم ہوا ہے کہ بیلور سے سیاحت پر نکلا ہوا 20 افراد کا ایک گروپ ملپے ساحل پر آیا تھا۔ جس میں سے تین افراد سمندر میں نہانے کے لئے اترے۔ مگر تیز لہروں کی وجہ سے وہ اپنا توازن کھو بیٹھے اور پانی میں بہہ گئے ۔ ماہر غوطہ خور ایشور ملپے کی ٹیم نے ان ڈوبتے ہوئے سیاحوں کو بچانے اور ساحل تک کھینچ لانے میں کامیاب ہوئی مگر گریش نے اسپتال جاتے وقت راستے میں دم توڑ دیا۔
اس معاملے میں ملپے پولیس اسٹیشن میں کیس درج کیا گیا ہے۔