اڈپی 26/مئی (ایس او نیوز) اڈپی ٹاؤن پولیس اسٹیشن میں درج کی گئی ایک شکایت کے مطابق مبینہ طور پر 25مئی کو صبح کی اولین ساعتوں میں یہاں پر ایک ڈکیتی کی واردات پیش آئی ہے، جس میں لٹیرے 45لاکھ روپے مالیت کے سونے کی سلاخیں اڑا لے گئے ہیں۔

 بتایا جاتا ہے کہ شکایت کنندہ وجئے جادھو شہر کی شیریاس نامی عمارت میں رہتا ہے۔اور وہ جویلرس کے پاس سے ملے ہوئے پرانے سونے کے زیورات کو پگھلا کر سونے کی سلاخوں میں تبدیل کرنے کا کام کرتا ہے۔ سونا پگھلانے کی کارروائی وہ لکشمی ٹریڈ سینٹر کے دوسرے منزلے پر انجام دیتا ہے۔

25تاریخ کو بھی اس نے پرانے زیورات پگھلا کر 1,227گرام وزنی سونے کی سلاخیں تیارکی تھیں جن کی مالیت تقریباً 45لاکھ روپے تھی۔ جب صبح 5.30 بجے   جب  وہ اپنی دکان کھول رہاتھا توماسک اور ہیلمٹ پہنے ہوئے دو اجنبی افراد اس کے پاس پہنچے اور زبردستی اس کے ہاتھ سے سونے کی سلاخوں والا بیگ چھین کر فرار ہوگئے۔

اُڈپی پولیس میں معاملہ درج کیا گیا ہے اور پولس نے جانچ  شروع کردی ہے۔