کوپل 7 / دسمبر(ایس او نیوز) کوپل میں ایک نابینا شخص کو زبردستی اپنے ساتھ لے جانے اوراس کی داڑھی جلانے کے ساتھ زبردستی جئے شری رام کہلوانے اوراسے پیٹنے جیسا غیرانسانی سلوک کرنے والے دو ملزمین کو کوپل پولیس نے گرفتار کرلیا ہے۔

حسین صاب (65 سال) نامی شخص کے ساتھ زیادتی کے تعلق سے گنگاوتی پولیس اسٹیشن میں ایف آئی آر درج کی گئی تھی۔ اس سلسلے میں پولیس نے تحقیقات کے دوران سی سی ٹی وی فوٹیج کی بنیاد پر جن دو ملزمین کو گرفتار کیا ہے ان کے نام ساگر کالکی (26 سال) اور نرسپّا داناکایار (30 سال) کی حیثیت سے کی گئی ہے۔ ساگر کالکی کے بارے میں معلوم ہوا ہے کہ وہ ایک سوفٹ ویئرانجینئر ہے جبکہ نرسپّا ایک کسان ہے۔

خیال رہے کہ یہ واردات 25 نومبر کی رات کو پیش آئی تھی جب حُسین ہوسپیٹ سے گنگاوتی جانے کے لئے آٹو رکشہ کے انتظار میں تھے کہ دو نامعلوم لوگ جو بائک پر سوارتھے، نے انہیں لفٹ کی پیش کش کرتے ہوئے اپنی بائک پر بٹھاکرپمپا نگر کے قریب کسی مقام پر انہیں دھکا دے کر بائک سے گراگیا پھر ان پرطعنے کستے اور گالیاں دیتے ہوئے پیٹائی شروع کردی۔ حُسین نےبائک پر بیٹھتے ہی اس کے ساتھ زیادتی شروع کی گئی تھی۔ اپنی شکایت میں حُسین نے بتایا کہ اس کی چھاتی پر لاتیں ماری گئی، یہاں تک کہ کانچ کے تکڑے سے داڑھی کاٹنے کی کوشش کی گئی جب اس میں کامیابی نہیں ملی تو داڑھی کو جلانے کی کوشش کی گئی۔ جب حُسین صاب کراہنے لگے اور مدد کی پکار لگانے لگے تو وہاں کچھ لوگ آگئے، جس کو قریب آتا دیکھ کر شرپسند فرار ہوگئے۔

واقعے کے بعد حُسین کو سانس لینے میں دشواری کی شکایت پیش آنے پر اسپتال میں داخل کیا گیا تھا اور پولس میں شکایت درج کی گئی تھی واقعے کے فوری بعد پولیس نے کسی ناخوشگوار واقعے کو ٹالنے کے لئے گنگاوتی کے علاقے میں حفاظتی بندوبست سخت کر دیا تھا ۔ کئی مسلم اداروں کے ذمہ داران نے پولیس کے اعلیٰ افسران سے ملاقات کرکے اس واردات کے ملزمین کو جلد از جلد گرفتار کرنے کا مطالبہ کیا تھا۔ جس کے بعد پولس نے سی سی ٹی فوٹیج کی بنیاد پر دو لوگوں کو گرفتار کرلیا ہے۔ پولس نے بتایا کہ مزید چھان بین جاری ہے۔