تشار گاندھی،رام پنیانی اور ٹیسٹا سمیت اہم شخصیات کی ایم وی اے کو ووٹ دینے کی اپیل
ممبئی، 13/اپریل (ایس او نیوز /ایجنسی) ریاست مہاراشٹر کی اہم اور معتبر شخصیات تشار گاندھی ، رام پنیانی، ٹیسٹا سیتلواد ،آنند پٹوردھن ،بی جی کولسے پاٹل ،رائو صاحب کسبے ،سمبھاجی بھگت اور دیگر نے مہاراشٹر کے ووٹرس سے اپیل کی ہے کہ وہ صرف اور صرف مہا وکاس اگھاڑی کو ہی ووٹ دیں تاکہ ایکناتھ شندے ، دیویندر فرنویس اور اجیت پوار جیسے مفاد پرست اور اقتدارپرست سیاستدانوں کومنہ توڑ جواب دیا جاسکے ۔ ان تینوں لیڈروں نے سیاسی اخلاقیات کو بالائے طاق رکھنے کے ساتھ ساتھ مہاراشٹر کی سیاست کو ’پاتال‘ میں پہنچادیا ہے۔ ان تینوں سے ریاست کا چھٹکارہ ضروری ہے کیوں کہ یہ صرف مودی اور امیت شاہ کی کٹھ پتلیاں ہیں۔ انہیں ریاست کے مفاد یا یہاں کی سیاست حالت سے کوئی سروکار نہیں ہے۔ یہ تینوں ہی صرف اقتدار سے چمٹے رہنا چاہتے ہیں۔
مہاراشٹر کے ووٹرس کے لئے جاری کردہ اپیل میں واضح طور پر ان تین لیڈروں پر تنقیدیں کی گئی ہیں اور کہا گیا ہے کہ گزشتہ ۳؍ سال کے دوران ان لیڈروں کی حرکتوں کی وجہ سے پورے ملک میں مہاراشٹر کی بدنامی ہوئی ہے۔ مہاراشٹر کے وقار کو بحال کرنے کے لئےمہا وکاس اگھاڑی کو ووٹ دیا جانا چاہئے جہاں نہایت سنجیدہ لیڈران موجود ہیں اور جو ریاست کی حالت کو بہتر بنانے کا ہنر جانتے ہیں۔ اہل مہاراشٹر ہمیشہ اخلاقیات کےاونچے معیار کو ترجیح دیتے رہیں اور اب موقع آگیا ہے کہ مہاراشٹر کے اسی وقار اور سیاسی اخلاقیات کو بحال کیا جائے۔ اسی لئے ہماری ووٹروں سے اپیل ہے کہ وہ نچلے درجہ کی سیاست کو مسترد کرتے ہوئے ملک اور ریاست کی باگ ڈور ایسے ہاتھوں میں سونپیں جو مفاد پرستی اور اقتدار پرستی سے کوسوں دور ہیں۔