بھٹکل کے ایک مکان میں پھر چوری؛ مدینہ کالونی میں پیش آئی تازہ واردات
بھٹکل 28/جنوری (ایس او نیوز) بھٹکل میں آئے روز چوری کی وارداتیں پیش آرہی ہیں، تازہ واقعہ مدینہ کالونی میں آج اتوار کومنظر عام پر آیا ہے جس میں چوروں نے گھرکے اندر گھس کر تمام الماریاں اور بیگوں کو کھول کر چھان مارا ہے اور قریب دس ہزار نقد رقم پر چوروں نے ہاتھ صاف کیا ہے۔ گھر میں سونے کے زیورات یا دیگر بڑی رقم نہیں رکھی گئی تھی، جس کی وجہ سے چوروں کے ہاتھ زیادہ کچھ نہیں لگ سکا ۔
اس بار چوری کی واردات مدینہ جمعہ مسجد کے قریب جناب محمد سعداللہ کے مکان پر پیش آئی، سعداللہ اپنی بیوی کے آپریشن کے تعلق سے بیوی کو لے کر مینگلور اسپتال گئے تھے، آج صبح پاس پڑوس کے لوگوں نے اُنہیں خبر دی کہ ان کے گھر کا دروازہ کُھلا ہوا نظر آرہا ہے ، انہوں نے فوری اپنے رشتہ دار کو خبر کی تو چوری کا انکشاف ہوا۔
محمد سعداللہ جناب سٹی میڈیکل اقبال کے بہنوئی ہیں۔ اقبال صاحب نے بتایا کہ کل ان کی ایک بہن کے گھر پر چوری کی واردات منظر عام پر آئی تھی، آج دوسری بہن کے گھر میں بھی چوری کا معاملہ سامنے آیا ہے۔ انہوں نے بتایا کہ بہنوئی سعداللہ بھی جمعہ کو ہی مینگلور آئے تھے۔ ان کا خیال ہے کہ دونوں گھروں میں ایک ہی رات چوری کی گئی ہوگی۔
سعداللہ صاحب کے مکان پر موجود تمام الماریوں کو کھولا گیا، تمام بیگوں کی تلاشی لی گئی ہے ۔ سبھی کپڑے اور ساز و سامان بکھرا ہوا پڑا تھا۔ دیکھنے سے پتہ چل رہا تھا کہ چوروں کو قیمتی سامان بالخصوص سونے زیورات کی تلاش تھی، جو اُن کے ہاتھ نہیں لگ سکی۔
واقعے کی اطلاع ملتے ہی بھٹکل مضافاتی پولس تھانہ کا عملہ موقع پر پہنچا۔ پولس چھان بین میں لگ گئی ہے۔