تائی پے،22؍اکتوبر (ایس او نیوز؍ایجنسی) حکومت اور آفیسران کی غفلت کی وجہ سے اکثر حادثات رونما ہوتے ہیں جن کے نتیجے میں عام شہری اپنی جانیں گنوا دیتے ہیں۔ اگر حکومتی عہدیدار عوامی حقوق کا خیال رکھتے ہوئے مناسب انتظامات کریں تو شہریوں کو حادثات سے بچایا جا سکتا ہے۔ تائیوان میں ٹرین کا خوفناک ترین حادثہ رونما ہوا ہے جس کے نتیجے میں ایک سو پچپن افراد ہلاک و زخمی ہو گئے ہیں۔

رپورٹ کے مطابق تائیوان کی کاؤنٹی یلان میں برق رفتار ٹرین خوف ناک حادثے کا شکار ہوگئی جس کے نتیجے میں 17 مسافر ہلاک اور 137 زخمی ہو گئے، ٹرین میں 366 مسافر سوار تھے۔ ریسکیو اداروں نے امدادی کاموں کا آغاز کرتے ہوئے ہلاک اور زخمی ہونے والوں کو قریبی اسپتال منتقل کر دیا جہاں کچھ زخمیوں کی حالت نازک ہونے کے باعث ہلاکتوں میں اضافے کا خدشہ ظاہر کیا جا رہا ہے۔

فائر بریگیڈ کے عملے اور تائیوان آرمی کے 120 سپاہیوں پر مشتمل فوجی دستے نے ٹرین کے اندر بری طرح پھنسے ہوئے مسافروں کو نکالنے کے لیے ٹرین کے بعض حصوں کو کاٹا اور مسافروں کو محفوظ مقام پر منتقل کیا۔ ریلوے حکام کا کہنا ہے کہ ٹرین کے پٹڑی سے اترنے کی وجہ کا تاحال تعین نہیں کیا جاسکا تاہم عینی شاہدین نے ٹرین حادثے سے قبل زوردار آواز سنی تھی جس کے ساتھ ہی دھواں بھی پھیل گیا تھا۔