عوام کو فلموں کا ٹکٹ اور کنبہ کو سیاسی ٹکٹ؛ سمالتا سے معافی مانگنے بی جے پی کامطالبہ
بنگلورو ،9مارچ (ایس او نیوز) دنیا بھر میں لوگ آج عالمی یوم خواتین منارہے ہیں ۔ لیکن ریاستی وزیر ایچ ڈی ریونا شوہر کو کھونے والی سمالتا امبریش کو دلاسہ اورہمت دینے کی بجائے توہین آمیز بیان دے رہے ہیں،سمالتا کومبارکباد دینے کی بجائے انتہائی سطحی تبصرہ کرنا ایک وزیر کوزیب نہیں دیتا۔بی جے پی، ریونا کے بیان کی سخت الفاظ میں مذمت کرتی ہے، ان باتوں کا اظہار بی جے پی کے ریاستی سکریٹری این روی کمار نے کیا۔
انہوں نے کہا کہ سابق وزیراعظم دیوے گوڈا ، کمار سوامی اور ریونا ریاست اور سماج کی ترقی نہیں چاہتے۔ بس ان کیلئے کنبہ کی سیاست اہمیت کی حامل ہے۔ کنبہ پروری میں ان کامقصد ہے ۔ اب منڈیا لوک سبھا حلقہ میں ان کے کنبہ کو ٹکٹ دلانے کے مقصد سے دوسروں کوسیاسی طو رپر ختم کیا جارہاہے۔روی کمار کے مطابق جے ڈی ایس ایک کنبہ پرور پارٹی ہے ۔ وہ کسی کو سیاسی طو رپرپروان چڑھتے ہوئے دیکھ نہیں سکتے ۔ روی کمار نے طنز کرتے ہوئے کہا کہ دیوے گوڈا کا کنبہ عوام کو صرف فلموں کے ٹکٹ دینے پریقین رکھتا ہے۔ ایم پی، ایم ایل اے ،ایم ایل سی اور ضلع پنچایت کے ٹکٹ صرف ان کے کنبہ کے لئے ریزرو ہیں۔ اس لئے دیوے گوڈا کے خاندان والے من مانی کررہے ہیں۔
انہوں نے زور دیا کہ ریونا کوفوری طورپر سمالتاسے معافی مانگنی چاہئے ۔ معافی کے مطالبہ پر نامہ نگاروں سے ریونا کا یہ کہنا کہ میں کیوں معافی مانگوں ۔ کیا میں پاگل ہوں ،اس قسم کارد عمل کسی بھی صورت میں اچھی نہیں ہے ۔ وہ اپنے کنبہ کی وجہ سے اس قسم کے غرور و تکبر والے بیان دے رہے ہیں ۔ انہوں نے مزید کہا کہ ریونا انتہائی چھوٹے دل اور انتقامی جذبہ رکھنے والے آدمی ہیں۔ان کی سوچ ہے کہ ان کے خاندان کے علاوہ کوئی بھی سیاستدان نہ بنے ۔ اسلئے وہ سما لتا امبریش پر توہین آمیز تبصرہ کررہے ہیں۔ سمالتا پر طنز ریاست کی خواتین کی توہین ہے ۔
