کاروار 28 / فروری (ایس او نیوز) پسماندہ طبقات (ایس ٹی) سے تعلق رکھنے والے وہ بے روزگار نوجوان اور خواتین جنہوں نے صحافت میں ماسٹر ڈگری مکمل کی ہے، انہیں اپنا صحافتی کاروبار شروع کرنے کے لئے کرناٹکا مہارشی والمیکی شیڈولڈ ٹرائب ڈیولپمنٹ کارپوریشن کے ذریعہ سبسیڈی والا فنڈ فراہم کیا جا رہا ہے ۔

     صحافت میں پوسٹ گریجویشن مکمل کیے ہوئے جو بے روزگار ضلع/تعلق کی سطح پر الیکٹرانک اور ڈیجیٹل میڈیا (یو ٹیوب چینل، سوشیل میڈیا نیوز پیجز، نیوز آن لائن بلاگ، نیوز کنٹنٹ کریئشن، آن لائن نیوز بلاگ، ویب پیجز، آن لائن صحافت، میڈیا سے متعلق تربیت) وغیرہ سیٹ اپ کرنے کے لیے یونٹ لاگت کا 70 فیصد خرچ یا 5  لاکھ روپے (باقی یونٹ کی بقیہ لاگت بینک سے حاصل کرنی ہوگی)  سبسیڈی رقم کے لیے اہل ہونگے ۔

    اس فنڈ کو حاصل کرنے کے لئے شیڈولڈ ٹرائب کے امیدواروں سے آف لائن درخواستیں طلب کی گئی ہیں۔

  26 مارچ درخواستیں جمع کرانے کی آخری تاریخ ہے اور اس تاریخ کے بعد موصول ہونے والی درخواستوں پر غور نہیں کیا جائے گا۔ 

     ضلع منیجر کرناٹک مہارشی والمیکی نگم کاروار کی طرف سے جاری پریس ریلیز میں کہا گیا ہے کہ  درخواست دہندگان کا یو اے ایم   (Udyog Aadhahar Memorandum)  میں رجسٹر ہونا ضروری ہے۔ متعلقہ تعلقہ کے تحت آنے والے محکمہ تعلقہ سماجی بہبود یا ضلع دفتر کرناٹکا مہارشی والمیکی شیڈولڈ ٹرائب ڈیولپمنٹ کارپوریشن سے درخواست فارم حاصل کریں اور ضروری دستاویزات کے ساتھ جمع کروائیں ۔      مزید معلومات کے لیے دفتر کے فون نمبر  226903 - 08382 پر رابطہ کریں ۔