بھٹکل 16/ڈسمبر (ایس او نیوز) میسور میں منعقدہ ریاستی سطح کے پرتیبھا کارنجی اُردو تقریری مقابلہ میں بھٹکل انجمن ہائی اسکول کا طالب العلم خبیب احمد اکرمی ابن مولانا خواجہ معین اکرمی مدنی دوسرا مقام حاصل کرنے میں کامیاب ہوگیا ہے۔
اسلامیہ اینگلو اُردو ہائی اسکول کا ہونہار طالب العلم خُبیب اس سے قبل ڈیویژن لیول، تعلقہ لیول پھر ضلعی لیول پر بہترین پرفارمینس پیش کرتے ہوئے اول مقام حاصل کیا تھا جس کے بعد وہ ریاستی سطح کے مقابلوں میں منتخب ہوا۔
آج میسور میں منعقدہ ریاستی سطح کے اُردو تقریری مقابلے میں خبیب نے پھر ایک بار شاندار پرفارمینس پیش کرتے ہوئے نہ صرف انجمن اور بھٹکل بلکہ ضلع اُترکنڑا کا بھی نام روشن کردیا۔
بتایا گیا ہے کہ ریاست بھر کے 34 اضلاع سے جملہ 68 طلبا نے اُردو تقریری مقابلے میں حصہ لیا تھا جس میں خُبیب احمد نے اپنی صلاحیتوں کے جوہر دکھلاتے ہوئے دوسرا مقام حاصل کیا۔
اسکول کے ہیڈماسٹر جناب شبیر احمد دفعدار نے اس موقع پر نہایت خوشی کا اظہار کرتے ہوئے بتایا کہ اس سے قبل کئی مرتبہ انجمن ہائی اسکول کے طلبا ریاستی سطح پر منعقد ہونے والے پرتیبھا کارنجی مقابلوں میں حصہ لے چکے ہیں، مگر یہ پہلا موقع ہے کہ اسلامیہ اینگلو اُردو ہائی اسکول کا طالب العلم ریاستی سطح پردوم مقام حاصل کرنے میں کامیاب ہوا ہے۔
ان کے اس بہترین پرفارمینس پر انجمن کےصدر جناب عبدالرحیم جوکاکو، جنرل سکریٹری جناب صدیق اسماعیل، ایڈیشنل سکریٹری جناب اسحاق شاہ بندری اور ہائی اسکول بورڈ سکریٹری جناب عبدالواجد کولا نے طالب العلم خُبیب سمیت ان کے والدین کو بھی دلی مبارکباد پیش کی ہے۔