بھٹکل :11؍ جنوری  (ایس اؤ نیوز ) آل انڈیا آئیڈیل ٹیچرس اسوسی ایشن (آئیٹا) اور بلاک ایجوکیشن افس (بی ای او)   بھٹکل کے اشتراک سے 11 جنوری 2024بروز جمعرات کو رابطہ ہال میں ایس ایس ایل سی طلبا و طالبات کے لئے ’ایس ایس ایل سی کے بعد کیا؟ اور امتحانی خوف کیسے دور کریں‘موضوع پر ورکشاپ کا کامیاب انعقاد ہوا۔ ورکشاپ میں 200سے زائد طلبا و طالبات شریک ہوکر رہنمائی حاصل کی۔

ورکشاپ کا افتتاح کرنے کے بعد خطاب کرتےہوئے  بھٹکل بلاک ایجوکیشن آفسر وی  ڈی موگیر نے طلبا سے کہاکہ وہ ایس ایس ایل سی امتحانات کے متعلق خوف نہ کھائیں ،البتہ بیدار رہیں۔ انہوں نے کہاکہ اگر ہم تعلقہ کے ایس ایس ایل سی نتائج پر غورکریں تو پتہ چلتاہے کہ  تعلقہ میں انگریزی  اور کنڑا مضامین  میں اکثر طلبا ناکام ہونے کی وجہ سے مجموعی نتائج کی شرح  میں کمی ہورہی ہے۔ انہوں نے  اردو میڈیم کے طلبا کو صلاح دی کہ وہ  کنڑا زبان کے متعلق زیادہ محنت کریں  اور دلچسپی سے پڑھائی کریں۔

مہمان خصوصی کےطورپر جماعت اسلامی ہند بھٹکل کے امیر مقامی مولانا سید زبیر نے کہاکہ طلبا کی تعلیمی زندگی میں ایس ایس ایل سی ایک موڑ کی حیثیت رکھتاہے، اگر یہاں ہماری بنیادی پڑھائی بہتر ہوتی ہے تو پھر آئندہ کی تعلیمی زندگی آسان ہوگی۔ بی ای اؤ دفتر بھٹکل کے اشتراک سے آئیٹا کے زیر اہتمام طلبا کےلئے ورکشاپ کے انعقاد کی انہوں نے ستائش کرتے ہوئے اسے  ایک بہتر قدم قرار دیا۔

ورکشاپ کے اہم رہنما عالمی سطح کی ایک  اہم کمپنی اپلوز ویلوسی (APPLUS VELOSI)اینڈ انڈسٹریز کے شعبہ تقرر کے صلاح کار جبران الدین خان نے پی پی ٹی کے ذریعے طلبا کی بہترین رہنمائی کی اور ایس ایس ایل سی کے بعد کن کن میدانوں میں وہ اپنی تعلیمی زندگی کو جاری رکھتےہوئے اعلیٰ مقام پاسکتےہیں اس کو بہتر انداز میں  پیش کیا۔

ورکشاپ کی صدارت کرتےہوئے آئیٹا کے ریاستی صدر محمد رضامانوی نے آئیٹا کی سرگرمیوں پر روشنی ڈالتےہوئے بتایا کہ آئیٹا اساتذہ اور طلبا کی رہنمائی کاکام انجام دیتی ہے۔ ریاست بھر کے کئی مقامات پر اساتذہ اور والدین کےلئے بھی ورکشاپ منعقد کئےجاتےرہے ہیں اور طلبا کے بہتر و روشن مستقبل کی طرف رہنمائی کےلئے بھی پروگرام منعقد کئےجاتے ہیں۔ آئیٹا کے بھٹکل تعلقہ صدر نعیم الحق نے نظامت کے فرائض انجام دیتےہوئے شکریہ کلمات اداکئے۔ ڈائس پر بی ای اؤ دفتر کے اشوک آچاری، نوائط کالونی اردو ہائی اسکول کے صدر مدرس افضل حسین وغیرہ موجود تھے۔