بھٹکل میں محکمہ پولس کے بچوں کے درمیان کھیل مقابلو ں کا انعقاد
بھٹکل:2؍ڈسمبر (ایس او نیوز) بھٹکل میں محکمہ پولس کے بچوں کے درمیان آج اتوار کو کھیل مقابلوں کا انعقاد کیا گیا جس میں کافی بچوں نے بڑھ چڑھ کر حصہ لیا۔ اس موقع پر خطاب کرتے ہوئے بھٹکل کے اسسٹنٹ کمشنر ساجد مُلا نے بتایا کہ کسی بھی مقابلے میں ہار جیت عام بات ہے ، مگر مقابلوں میں دلچسپی سے شریک ہونا ہماری شخصیت مکمل ہونے کا ثبوت ہے۔اے سی نے کہا کہ دنیا میں پیدا ہونے والے ہرایک انسان میں کوئی نہ کوئی صلاحیت ضرور موجود رہتی ہے صلاحیتوں کو چھپا کر رکھنا ممکن نہیں ہے ، مگر ان صلاحیتوں کے لئے مواقع کی تلاش رہتی ہے ، اب جب کہ ایک سنہرا موقع میسر آیا ہے تو کھلاڑیوں کے لئے ضروری ہے کہ وہ اس کا صحیح استعمال کرتے ہوئے آگے بڑھیں۔
تعلقہ کے ساگر روڈ پر واقع پولس پریڈ میدان میں پرندوں کو ہوا میں اُڑاتے ہوئے مقابلوں کا افتتاح کیا گیا۔
سرکل پولس انسپکٹر گنیش نے استقبال کیا، پی ایس آئی کوسومادھار نے نظامت کی۔ کانسٹبل ماروتی نائک نے شکریہ اداکیا۔ ورکنگ جرنلسٹ اسوسی ایشن کے ضلعی صدر رادھا کرشنا بھٹ اور بھٹکل ڈی وائی ایس پی ویلنٹائن ڈیسوزا جو خود بھی کھلاڑی رہے ہیں اس موقع پر موجود تھے۔