کاروار کے قریب جوئیڈا کی کالی ندی میں غرق ہوکر ایک ہی خاندان کے چھ لوگوں کی موت؛ بچی کو بچانے کی کوشش میں دیگر لوگوں نے بھی گنوائی جان
کاروار 21/ اپریل (ایس او نیوز) چھوٹی بچی کوکالی ندی میں ڈوبنے سے بچانے کی کوشش میں ایک ہی خاندان کے جملہ چھ لوگوں کی المناک موت واقع ہوگئی۔ واردات کاروار سے قریب 80 کلو میٹر دور جوئیڈا تعلقہ کے اکوڈا نامی دیہات میں اتوار شام کو پیش آئی۔
ذرائع سے ملی اطلاع کے مطابق ہبلی کے ایشور نگر ا ور ان ہی کے خاندان کے بنگلور میں رہائش پذیرلوگوں کا ایک گروپ گرمیوں کی پکنک منانے اکوڈا میں واقع کالی ندی کی سیر کو پہنچا تھا۔ خاندان کے آٹھ افراد ندی کنارے پانی سے کھیل رہے تھے کہ ایک بچی پانی میں گر گئی اور غرق ہونے لگی۔ بچی کو بچانے کی دل دہلا دینے والی کوشش میں، ایک ایک کر کے، خاندان کے پانچ افراد کالی ندی میں اُترتے چلے گئے اور بدقسمتی سے سبھی غرق ہوکر جاں بحق ہوگئے۔ انا للہ و اناالیہ راجعون
بتایا گیا ہے کہ بینگلور میں مقیم لوگ ہبلی میں اپنے رشتہ دار کے ہاں پہنچ کر اُن کے ساتھ پکنک منانے ڈانڈیلی کے قریب واقع جوئیڈا تعلقہ کے اکوڈا پہنچنے کا پروگرام بنایاتھا ، مگر یہ تفریح جان لیوا ثابت ہوئی اور خوشی کا ماحول سوگ میں تبدیل ہوگیا۔
مرنے والوں کی شناخت ہبلی کے رہنے والے نذیر احمد چمن صاب (40)،ان کی بیٹی الفیہ (10) اور موہین (6)،نذیر کی بہن ریشما توفیق احمد(38)،ریشما کے بچےاِفراء احمد (15) اور عابد احمد (12) کے طور پر کی گئی ہے۔ خاندان کی دو خواتین جو ندی میں نہیں اُتریں تھیں، وہ محفوظ رہ گئیں۔
واقعے کے بعد ڈانڈیلی مضافاتی پولیس موقع پر پہنچی اور تمام چھ لاشوں کو مقامی لوگوں کی مدد سے بازیافت کرایا۔ لاشوں کو پوسٹ مارٹم کے لیے ڈانڈیلی اسپتال بھیج دیا گیا ہے۔ ڈنڈیلی مضافاتی پولیس تھانہ میں معاملہ درج کیا گیا ہے۔