سرسی : بی جےپی ضلعی صدر پر ہی ایم پی اننت کمارہیگڈے گرم : ایم پی کی بات نہیں مانی گئی تو خفا ہوکر کی چیخ پکار
سرسی :25؍جنوری (ایس اؤ نیوز ) اترکینرا کے رکن پارلیمان اننت کمار ہیگڈے، ضلع جنرل سکریٹری عہدے کی نامزدگی کو لے کر سرکٹ ہاؤس میں منعقدہ خفیہ میٹنگ میں بی جےپی کے ضلعی صدراین ایس ہیگڈے پر دباؤ بنانے اور چیخ پکار کئے جانےکی اطلاعات موصول ہوئی ہیں۔
منگل کو سرسی کے سرکٹ ہاؤس میں اخبار نویسوں کو بتائے بغیر بہت ہی رازدارانہ طورپر صرف اور صرف چند لیڈران کے ساتھ میٹنگ منعقد کی گئی تھی۔ایم پی اننت کمارہیگڈے ، سابق ودھان سبھا اسپیکر وشویشورہیگڈے کاگیری ، سابق ضلعی صدر وینکٹیش نایک، ہلیال کے سنیل ہیگڈے ، بھٹکل کے گوند نائک ، حالیہ جنرل سکریٹری چندرو ایسلے، اوشا ہیگڈے ، گروپرساد ارسے بائیل کے ساتھ خفیہ میٹنگ منعقد کی گئی تھی۔ میٹنگ میں جنرل سکریٹری کے عہدے کے متعلق گفتگو ہوئی ۔ بتایا جارہاہے کہ ضلع بھر سے قریب 12لیڈران نے اس عہدے کے لئے درخواست دی تھی ۔ان 12درخواستوں کو ریاستی سطح کے عہدیداران کو بھیج کر انہی سے عہدے کا اعلان کرائے جانے کا فیصلہ لیاگیا ایک طرح سے میٹنگ اختتام کو پہنچ چکی تھی۔ تب سابق اسپیکر وشویشور ہیگڈے کاگیری میٹنگ سے نکل گئے۔یہ بھی بتایا جارہاہے کہ جنرل سکریٹری کے عہدے کے لئے اننت کمارہیگڈے نے جس لیڈر کو نامزد کرنےکہا تھا اس کے متعلق وشویشور ہیگڈے کاگیری متفق نہیں ہوئے۔
کہاجارہاہے کہ اس کے بعد ضلعی صدر اور اننت کمارہیگڈے کے درمیان کافی توتو میں میں اور چیخ پکار ہوئی۔ہوا یوں کہ شکریہ کلمات کے بعد کاگیری چلے گئے توایم پی اننت کمارہیگڈے نے ضلعی صدر کو صلاح دی کہ ریاستی عہدیداران کو 12عرضیاں مت بھیجو، اس میں کمی کرکے بھیجو۔ لیکن ضلعی صدر اس سے انکار کرتےہوئے کہاکہ آپ کو یہ صلاح پہلے دینی تھی ، جب میٹنگ چل رہی تھی اور کاگیری موجود تھے تبھی کہتے تو کوئی فیصلہ لیا جاسکتاتھا، اب میٹنگ ختم ہوچکی ہے اب اس سے کیا فائدہ ، اور اب میں آپ کے مشورے پر عمل کروں تو میرا نام خراب ہوگا، میں ایسا نہیں کرسکتا۔ ضلعی صدر این ایس ہیگڈے کی اسی بات پر گرم ہوئے اننت کمارہیگڈےچیخ پکار کرنے لگے اور رعب ڈالتے ہوئے بڑی آواز میں کہاکہ آخر ہمیں ایسی میٹنگوں میں بلایاہی کیوں جاتاہے ؟، یہاں سب آدھا ادھورا کام کیا جاتاہے۔
بتایاجارہاہےکہ متعلقہ میٹنگ پہلے پارٹی دفتر میں بلائی گئی تھی ۔ لیکن اننت کمارہیگڈے ضد پر اڑے رہے کہ میں پارٹی دفترنہیں آؤنگا ۔ تب یہ میٹنگ سرکٹ ہاؤس منتقل کی گئی ۔ مجموعی طورپر لوک سبھا انتخابات کو لےکر اننت کمارہیگڈے کا کھیل ابھی ابھی شروع ہواہے اب یہ کہاں جاکر رکے گا دیکھنا ہوگا۔ کیونکہ چاربرسوں سے عوام سے دور رہے اننت کمارہیگڈے اب اچانک لوک سبھا انتخابات کے پیش نظر ہر جگہ نظر آنے کی کوشش کررہےہیں ، مگر پے درپے دیکھا جارہاہے کہ اننت کمار ہیگڈے کو خود ان کی پارٹی میں ہی وہ حیثیت ، مقام نہیں مل پارہاہے جو وہ جتاتے رہے ہیں۔
