بھٹکل،7؍مارچ (ایس او نیوز) شیرالی چتراپور میں ایک 14سالہ نوویں جماعت کی طالبہ کے ساتھ ناجائز جنسی تعلقات قائم کرکے اسے حاملہ بنانے کے الزام میں پولیس نے دو ملزمین کو پوکسو ایکٹ کے تحت گرفتار کر لیا ہے۔ جن کی شناخت سرسی کے رہنے والے روی پٹگار(35سال) اور شیرالی گوڈی ہیتل کے رہنے والےشیوراج نائک (22سال) کے طور پر کی گئی ہے۔
متاثرہ لڑکی کی والدہ نے بھٹکل دیہی پولیس اسٹیشن میں جو شکایت درج کروائی ہے اس کے مطابق متاثرہ افراد ضلع سیگندور کے رہنے والے ہیں۔ یہ لوگ پہلے چتراپور میں ایک کرایے کے مکان میں رہتے تھے۔ پھر وہ مرڈیشور کے تیرن مکی میں منتقل ہوگئے۔ لیکن متاثرہ لڑکی اپنے سہیلی سے ملنے کے لئے بار بار چتراپور آیا کرتی تھی ۔ اس دوران ملزمین سے اس کی دوستی ہوگئی جو بعد میں ناجائز جنسی تعلقات میں بدل گئی۔
پولیس کا کہنا ہے کہ اس کے پاس درج کی گئی شکایت میں روی پٹگار کا نام ہی درج تھا لیکن تحقیقات کے دوران شیوراج نائک کا کردار بھی سامنے آیا، جس کے بعد ان دونوں کو گرفتار کرکے عدالت میں پیش کیا گیا جہاں سے انہیں عدالتی حراست میں بھیج دیا گیا ہے۔ مزید تحقیقات جاری ہے۔