بھٹکل میں اسکول ٹیمپو ڈرائیورس کے ساتھ محکمہ تعلیم کی نشست
بھٹکل 15 / دسمبر (ایس او نیوز) بھٹکل میں پرائیویٹ اسکول بس ڈرائیورس کے ساتھ بلاک ایجوکیشن آفیسر، اسکول انتظامیہ کے ذمہ داران اور محکمہ پولیس کے افسران کی ایک میٹنگ اسلامیہ اینگلور اردو ہائی اسکول کے میٹنگ ہال میں منعقد ہوئی ۔
اس میٹنگ میں ریسورس پرسن کے طور پر بھٹکل شہری پولیس تھانے کے اے ایس آئی راجیش نائک نے کہا ڈرائیورس کو بچوں کی جان کا تحفظ یقینی بناتے ہوئے تمام قوانین کی پابندی کرنی چاہیے ۔ گاڑی کے تمام دستاویزات کو صحیح ڈھنگ سے رکھنے کے علاوہ وقتاً فوقتاً انہیں رینیول بھی کروانا چاہیے ۔
ٹاون پولیس اسٹیشن کے پی ایس آئی شیوانند اور بلاک ایجوکیشن ڈپارٹمنٹ کے ریسورس پرسن ناگیش مڈیوال نے آر ٹی او کی طرف سے اسکولی بسوں کے لئے جاری کی گئی ہدایات کی تفصیل ڈرائیوروں کے سامنے رکھی ۔
بلاک ایجوکیشن آفیسر وی ڈی موگیر نے اسکول بس ڈرائیوروں سے کہا کہ کسی بھی قسم کی عجلت اور دباو کے اثر میں آئے بغیر گاڑیاں چلائیں کیونکہ آپ کے ہاتھوں میں بچوں کی قیمتی جانیں ہوتی ہیں ۔ نیو شمس اسکول کے سینئر استاذ محمد رضا مانوی اور آر این ایس انتظامیہ کمیٹی کے ذمہ دار دنیش گاونکر نے بھی اس موقع پر اپنے خیالات کا اظہار کیا ۔
میٹنگ میں حاضر ڈرائیوروں نے بھٹکل کی سڑکوں کی درستی ، تنگ جگہوں پر پارکنگ کا مسئلہ اور پرانے بس اسٹینڈ کے پاس سڑک کنارے مچھلی فروشی کی وجہ سے ہو رہی مشکلات کا تذکرہ کرتے ہوئے کہا کہ صبح کے وقت یہاں گاڑی چلانا دشوار ہوجاتا ہے اس لئے اس مسئلی کو جلد حل کیا جائے ۔
اس کے علاوہ ڈرائیوروں نے بلاک ایجوکیشن کے سامنے اسکول انتظامیہ کی طرف سے بر وقت تنخواہ ادا نہ کرنے، پراویڈنٹ فنڈ کے سہولت نہ ہونے، مقررہ وقت پر گاڑی اسکول پہنچانے کی پابندی، ڈرائیوروں کو کسی قسم کی سہولت دستیاب نہ ہونے جیسے مسائل کا ذکر کرتے ہوئے کہا کہ بار بار ڈرائیور اپنی نوکری چھوڑ کر چلے جاتے ہیں ۔ اس کی وجہ سے بہت سے مسئلے پیدا ہوتے ہیں ۔ اس لئے یہ پورا نظام درست کرنے کے لئے انتظامیہ کمیٹی کو ہدایت دینی چاہیے ۔